Les Pages Jèrriaises

Bouon annivèrsaithe, Rolls-Royce!



Mé, j'aime bein l's avions, mais man péthe aimait les vaituthes et j' m'rappelle la preunmié fais qu'il arrivit siez nous dans sa nouvelle, un Rolls-Royce. Ma méthe n'tait pon trop heutheuse, lyi, viyant qu'ou pensait qu'les Rolls-Royce 'taient seulement pouor les “nouvieaux-riches” et qu' ch'tait un mio vuldgaithe d'en aver eune telle vaituthe. J'crai qu'ou 'tait convaintchu d'li allouer d'en garder viyant qu'i' dit qu'i' n'fallait pon l' changi touos l's ans, comme il en avait fait auve les vaituthes dé d'vant.

Dans sa vie, il en avait neuf. San favori 'tait l' Rolls-Royce Wraith d's années trente, tch'il acatit en Angliétèrre mais tchi fut restauré ichîn en Jèrri. Dans chutte vaituthe, l' engîn marchait si douochement qu'nou n' ouïyait qu' un tic-tic en d'dans – et chenna v'nait dé l'hôlouoge! Un autre 'tait eune vèrsion spéciale faite pouor l' septante-chîntchième annivèrsaithe d'la compangnie Rolls-Royce, auve s'n êtchusson RR en rouoge, dé tchi i' n'y avait qu' septante-chînq faite pouor l'monde entchi. I' vendit chutte vaituthe-là en Angliétèrre, et achteu oulle a vîngt-chînq ans, et la compangnie a fait pus qu' nénante mille vaituthes dans ses chent ans.

L's engîns d' Rolls-Royce s'trouvent non seulement dans les vaituthes, mais dans l's avions étout – les Spitfires, Hurricanes et Lancasters d'la deuxième dgèrre mondiale, les Concordes et les Harriers, et i' s'en vont être dans l' nouvel Airbus A380 supèr-Jumbo. D's engîns tch'ont l'fanmeux RR dessus sont înstallés dans l'pus grand baté d' gabot'tie dans l'monde, la Reine Mathie Deux.

Bouon annivèrsaithe, Rolls-Royce!

Tony Scott Warren

 

Viyiz étout:

 

Les Pages Jèrriaises