Les Pages Jèrriaises

Chais Accidents

Moussieu l'Editeu

Sans doute ous avez r'mértchi que y'a yeu hardi d'accidents dans nos routes dérnièthement. Eh bein, j'm'en vais vos raconté une p'tite convérsation que j'eûmes hier au sé, la Merrienne et mé entouôre chonna.

Ouelle avait veu les rapports de deux accidents sérieux le jour de d'vant, et des hommes et femmes que nous avait transporté à l'hopita, et, châtchant la tête, ou m'dit que ch'tait têrriblye.

"Si chonna continue," ou s'fit, "y faudra bâti d's'hopitaux dans toutes les pâraisses, aggrandi nos chim'tièths et trouvé des maisons pour la foule de docteurs tch'éthont à v'nin d'Angliétêrre. Tchèsq'est la cause, don, Ph'lip, de toutes chais collîsions?"

"Ch'n'est pas une cause, mais plûsieurs causes," j'l'y dit. "A qu'menchi y'a tant d'môteurs dans l'ile au jour d'agniet que ch'est un méthaclye que n'y'a pas pûs d'accidents. Nos routes et nos ruéttes ne sont pas large assez, épis y'a des dêtours et des cârrefours partout."

"Y'a chinquante ans," ou dit, "même les routes n'étaient pas fort pûs large tchi n'sont ach'teu, et les ruettes n'ont pas changi pour dithe. Quant ès dêtours et carrefours, ils ont tréjours tait là. Mais nous allait douochement, et quand nou viyait tchiquechose tchi v'nait nou s'dècarrait, même nou cachait dans une braique pour faithe du run. Nou pouvait au mains allé faithe une prom'nade sans dithe à bétòt à ses pathents d'vant sorti."

"P't'être bein," j'l'y dit, "mais ch'tait des quêrres ou des vans ou des hérnais qu'nou viyait dans qu'mins, et nou prenait san temps. Y'avait des piérres cassées ichin et là, et j'ai veu prendre une bouonne heuthe et d'mie pour arrivé en Ville d'ichin."

"Et mé," ou dit, "j'me r'souveins d'avé tait ôu té une bordée dans l'hérnais. J'fûmes par la Rue d'Drièthe et j'm'en fut vais ma couôsine tch'y d'meuthait tout près d'la Route Trousse Cotillion aupi d'la Vieille Eglyise, tandis qu'tu tais à ramâssé un tonné d'gouaino. Pas pour dithe, Ph'lip, mais nou n'tait pas trop confortablye dans chu hérnais. Pour une semaine après je n'pouvais pas résté dans ma tchaise pour pûs d'chinq minutes. J'eûmes à d'valé tous les deux en ramontant Biaumont, et quand je r'vint j'tais pûs lâssée qu'si j'avais marchi tout l'long du qu'min, mais au mains j'n'avais pas un bras ou une gambe rompue."

"Nan," j'l'y dit, "et si j'avions tait longtemps hors, n'y'avait rain tchi prêssait ichin. Mais, ma pouôre Merrienne, si j'ramontaimes la Rue d'Drièthe au jour d'agniet le monde si fich'chaient d'nous, et pûs qu'probablye je s'saimes arrêtés pour avé blotchi l'traffic. Le Juge Dorey dithais 'Deux louis ou quatre jours,' et j'éthaimes la honte de vais notre portrait sûs la gâzette."

La Merrienne souôrit. "Tu m'as dit," ou s'fit, "que y'a plûsieurs raisons, mais est-che que tu n'crais pas qu'la vraie raison ch'est qu'tout l'monde sont trop prêssis au jour d'agniet? Y m'semblye mé que touos chais môteurs vont bein trop vite. Quant ès môteurs-bikes j'saute bein vite sûs l'fossé quand j'en entends yunne appréchi. A les vais nou dithait tch'ils appréhendent que l'djiablye est souotre yeux."

"Et pûs d'yun trouve que ch'tait vrai," j'l'y dit. " Tu'as raison, Merrienne, ch'est là la grande cause de tous chais l'vées d'corps. Trop vite, trop vite, trop vite! Nou craithait vraiement que ch'est une bordée d'fun de ristchi sa vie et la vie d'autchun tch'y s'trouve à la vaie. Et n'y'a rain à faithe, car tant pûs qu'nou lûs dit de prendre des précautions, tant pûs qu'nou lûs dîmontre que chinq minutes de pûs sûs la route ne f'thait autchune difféthence, tant pûs d'risques tch'y prennent. Ch'est d'même, ma fille et y faut s'y résigni."

"Eh bein, a ma veue, ch'est triste," ou dit "mais ch'est là l'monde d'ach'teu."

Ph'lip

 

Viyiz étout:

 

Les Pages Jèrriaises