Les Pages Jèrriaises

Le monde est fo

J'ai r'mertchi que dernièthement il est v'nu de drôles d'idées dans la vielle tête à la Merienne. Y'a même des bordées quand j'qu'menche à craithe qu'oulle est en êfange, mais ch'n'est qu'par bordée, car a la prendre yun dans l'autre, ch'est une femme de bouon sens, tch'est r'nommée dans la pâraisse, et y'en a hardi tch'y veinnent siez-nous pour la consulté quand y sont en dêtresse.

Mais dans l'temps d'la plienne lune y m'semblye tchiquefais par san d'vis qu'ou n'est pas trop bein dans sa tête, car ou veint tout-à-fait dêraisonnablye, et nou n'gagne rain d'ardgumenté. En autchun cas, oulle à une tête pûs duthe que la piérre du Mont Mado ou d'la carrièthe à l'Eta tch'appartenait aut'fais au bouon-homme Ph'lip Gallichan, prédicateur local et bâtisseux du talus dans la baie d'Saint-Ou.

Lundi au sé, ayant mint bétôt une heuthe à liéthe la gâzette, ou la mint sûs ses g'nors, et, sans un mot d'explicâtion voulit savé quantchi qu'chonna s'n'allant arrêté."

"De tchi qu'tu pâsle?" j'l'y d'mandit, mettant ma pipe sûs l'aie-du-foyi. "Tchèsque ch'est qu'nou dév'thait arrêté?"

"Ch'est les fichues moteur-bikes," ou raiponnit. "R'garde la gâzette et tu vêrras pour té-même, si n'est pas grand temps qu'nou faiche tchiquechose pour empêchi chais accidents continuels. Y'a quatre histouaithes de collîsions, de gambes et d'bras rompus, et d'admissions à l'hopita. Si chonna continue nous étha à l'aggrandi ch't'hopita, et j'ai dêjà ouï que l'Comité d'la Santé Publique est à considéthé combain qu'chonna couôt'tait à l'ile. A ma veue ch'est absolûment scandaleux."

"Eh bein," j'l'y dit, "il est vrai qu'chais moteur-bikes sont la cause de trop d'accidents, mais ouèsque est le r'miède?"

"Nou dév'thait les traité comme le Colorado Beetle," ou dit, "ch'est à dithe les dêtruithe. Si, par exemple, un jeune gâs savait qu'si pâssait par ichin sûs sa moteur-bike, y risquethait une chérge de pliomb dans l'dos, y restethait siez-l'y. Le vier boucagni est ocquo pendu dans la tchuîsine, et je n'doute pas que j'pouôrrais ocquo m'en faithe sérvi."

J'm'êbouffit d'rithe. "Ma pouôrre Merrienne," j'l'y dit, "tu perds la tête. A qu'menchi, y'a bétôt chinquante ans que l'boucagni est la, et bein seux tchi bostethait si êprouvait à tithé autchune chose avec. Et si par chance tu t'faisais responsablye pour un meurtre, tu s'sais ou pendue par le co ou enfreumée à l'âsile pour le restant d'ta vie."

"Ch'n'est pas vrai," ou dit, "car un Jury de bouons Jêrriais dithaient que la mort tait accidentelle, et qu'en autchun cas ch'tait pour le bein d'l'Ile que j'avais tithé d'sûs. Probablyement, nou m'donn'nait une médaille et une adrésse sus parchemin. Mais y'a une autre chose, Ph'lip. La gâzette dit que dans p'tit d'temps nou pouôrra allé d'ichin à Londres dans une heuthe dans yunne de chais machines-là tchi volent comme des ouaisiaux. Tchi distance que y'a d'ichin à Londres?"

Je m'grattit la tête, car y faut admettre que quand j'tais mousse j'tais tréjous au bas d'la classe pour la géographie. Enfin j'l'y dit que je n'pouvais pas dithe à une pérque de près, mais que ch'tait certain que ch'tait tchiques chents milles. "Pour arrivé là dans une heuthe," j'ajouôtit, "y faudra pas s'mettre à copé des caboches en route."

"Des chents milles?" ou s'fit. "Et crai-tu qu'chonna dév'thait être pèrmint?"

"Damme!" j'l'y dit, "quant à mé, bein seux que j'ne s'sait pas parmi les pâssagièrs, mais y'en étha tch'y ristchithont. Tu vé, Merrienne, y faut avoué que tant pûs que l'temps va tant pûs les gens sont prêssis, et tant pûs vite tch'y veulent allé."

"Vaith," ou dit, "et l'jour vaindra tch'y voudront allé un mio pûs vite epis coumme disait l'prédicateur d'aut'fais: "Quel pataflias, mes frères!" Lé monde est fo!"

Ph'lip
 

Viyiz étout:

 

Les Pages Jèrriaises