Auve l'întéthêt au jour d'aniet pouor la santé et la seûth'té, nou n'craithait dgéthe chein tchi soulait s'pâsser à la Batâle des Flieurs. Dans les jours quand les chars 'taient passecrits à la fîn d'la pathade, les dêcorâtions flieuthies 'taient ég'dachies à seule fîn d'faithe sèrvi d'meunitions ès participants et spectateurs. Sans doute, tout est bein pus seûth'tabl'ye au jour d'aniet et nou peut èrmouontrer ses chars à la pathade du sé (tch'est dév'nu un si grand succès) et, à ches drein, à la Fête dé Noué. La Batâle a acouo sa charme, mais a-t-alle pèrdu tchiquechose en s'trantchilisant?
Pouor dé mé, j'n'ai rein pèrdu, car la bastaude atout les flieurs fut arrêtée d'vant qué j'fûsse né. Tout coumme, y'a eune partie dé m'n esprit - sans doute la partie la mains respectabl'ye - tch'éthait aimé pitchi des pétales ou cliamûther atout des chrysanthèmes. Les flieurs sont tchiquefais des sŷmboles dé paix, mais l's Angliais, n'ont-i' pon ieu des Dgèrres des Roses?
L'amendement n'est pon raîque dans la santé et la seûth'té, car la technologie avanche étout. Achteu lé Hansard du Parlément du Rouoyaume Unni d'pis l'dgiêx-neuvième siècl'ye est en lîngne sus l'Ithangnie et nou peut y tchilyi des faits-divèrs, 'ouôth-en-châle. Par exempl'ye, lé 26 d'Août 1907 la Batâle des Flieurs en Jèrri fut distchutée dans la Chambre des C'meunes. Messire Herbert Nield, lé Député d'Ealing, d'mandit au S'grétaithe pouor l's Affaithes dé Siez Ieux entouor iun d'ses êlecteurs d'Ealing, un Moussieu Cecil Douglas, tch'avait 'té blioutchi par l'Juge Vaudîn pouor aver deslotchi l'chapé d'un offici atout un pangni (ofûche eune pann'lée d'flieurs?) duthant la Batâle dé chu mais-là en Jèrri. L'adèrt d'Ealing happit eune journée en boête. Lé Député fut chotchi qu'san constituant n'avait rien r'chu à mangi en prison excepté eune vèrrée d'lait. Lé Minnistre, Moussieu Herbert Gladstone, rêponnit qu'lé Gouvèrneux lî'avait dit qu'lé Juge avait dit qué ch'tait raîque en peunnissant les trop entchéthinnés qu'nou pouôrrait asseûther eune batâle modéthée, et en tout cas lé prisonnyi avait 'té prisonnyi raîque dé onze heuthes du matîn jusque dans les chîntch' heuthes et d'mie d'l'arlévée et qu'nou lî'avait donné lé r'pas d'couôteunme. Et l'Député à d'mander si l'Minnistre 'tait au couothant qu'lé r'pas d'couôteunme dans la prison d'Jèrri 'tait au pain et à l'ieau. Lé Minnistre èrmèrtchit qu'dans chu cas, la vèrrée d'lait 'tait par d'ssus l'marchi.
Assa, pot d'pichi n'est pon profit sus la tête d'un offici. Et mus vaut des flieurs à la Batâle qu'des freûleurs. Bouonne Batâle!
Geraint Jennings
Viyiz étout: