Les Pages Jèrriaises

Ph'lip va à la Bataille

mais jamais d'autre

Au Portinfé
Vendredi.
Moussieu l'Editeu,

Je s'y si lâssé que si la Merrienne ne m'avait pas app'lé un pièrcheux fini je n'crais vraiement pas que j'éthais yeu l'couothage de vos êcrithe agniet.

La raison pourtchi que j'n'ai pas valu quatre sous tout l'jour ch'est que j'fut bête assez d'allé à chutte Bataille de Flieurs. Quand j'en pâslit à la bouonnefemme Mêcredi au sé, ou me d'mandit si j'tais fo. "La Bataille de Flieurs," ou dit "est pour les vîsiteurs, pas pour des férmiers tch'ont des raves à sérclyi. J'en ai honte quand je r'garde chu bétchet-là, car nou n'vait qu'des ch'nilles. Reste siez-té et fais tans travas. Quand tu'éthas pâssé les raves tu pouorras v'nin dans l'gardin froutchi mes bordeuses"

Ach'teu, Moussieu, chonna m'fit mârri, et comme j'pense bein qu'ous éthiez fait, j'm'entêtit. "Fiche des raves," j'l'y dit, "y n'enhann'nont pas pour un jour, et quant à tes bordeuses, tu n'veur jamais m'laissi tchillyi une flieur, ch'est pourtchi tu peux faithe la frouq'thie."

Et don, Moussieu, quand vint hier matin, j'm'habillyit dans tout man Dimanche, et tuot-d'suite après dîné, ayant trouvé un pâssage, me v'la hors pour la ville. La Merrienne ne m'avait pas dit un mot d'pîs Mêcredi au sé.

J'arrivit là en tout plien d'temps et j'péyit une piéche d'êtchu pour entré. Mais ch'n'tait pas fini, car y m'couôtit ocqquo trais ch'lins et d'mi pour un siège, car j'n'éthais jamais put résté d'but si longtemps. "N'en v'la pour siez ch'lins," je m'dit, et p't'être après tout qu'j'éthais fait mûs d'sauvé mes sous et d'pâssé une heuthe ou deux dans man bétchet d'raves. Il est trop tard ach'teu, mais j'séthai pour une autre fais."

Eh bein, Moussieu, j'fut là pour quatre mortelles d'heuthes, car une fais assis nou n'pouvait pas bouogi. Une grôsse femme à ma drouaite tch'y suait comme un boeu, et d'l'autre côté une maigre hardelle tchy m'fichait des coups d'coude dans les côtes une vingtaine de fais par minute.

Avec chonna, y faut dithe que l'spéctaclye tait hardi biau. Jamais j'n'éthais creu que chonna pouvait s'faithe en Jêrri. La grôsse femme et la maigre hardelle taient en extâse et des touos les côtés ch'tait d's'applaudissements et des hourras. ah vèthe, y faut adméttre, Moussieu que ch'tait mérveilleux, mais quand vint un temps, j'éthais donné tchiquechose pour pouvé dêshallé pour tchiques minutes, si y'avait yeu moyen. Je crais, Moussie qu'ou comprendrez chein que j'veur dithe. Malheutheusement, n'y'avait pas moyen, et souos les circonstances n'y'avait qu'une chose à faithe et ch'tait de t'nin bon et souffri sans dithe rain. Oh, Moussieu, que j'éthais tait content dans des moments de me r'trouvé parmi mes raves ou même dans l'gardin avec la froutchette à Merrienne.

Epis, Moussieu, après un couplye d'heuthes j'avais une se mais une sé de tchi que j'pensais en crevé. J'pensit à man p'tit prainseu et ès deustrais bârriques tchi s'trouvent là, et v'la tchi n'amendait pas les choses du tout. Si jamais y'a yeu un homme dépis la fondation du monde, tch'a tait content de r'trouvé sa libérté, ch'tait mé quand à la fin j'put dêshallé d'chutte prison-là.

Je m'trouvais mûs, mais hardi lâssé quand une heuthe ou d'même pus tard j'me r'trouvit dans ma tchuisine bein anxieux d'savé si la Merrienne tait dans d'miyeu sentiments. Ou n'me fit pas trop belle mine en qu'menchant, mais bétôt la v'là à m'versé une yasse de tais et à m'passé un gros mio d'pâté qu'oulle avait fait dans l'arlevée.

"Eh bein, te v'là r'venu," ou s'fit en même temps. En as-tu yeu pour tes sous chu coup?"

"Oui, ma chièthe," j'l'y dit, et pûs qu'assez. La préchaine fais j'ithai sérclyi mes raves et digoté dans tan gardin."

Ph'lip
Les Chroniques de Jersey 30/7/1955

 

Viyiz étout:

 

Les Pages Jèrriaises