Moussieu l'Editeu,
Mêcredi au sé, j'dis à la bouonnefemme que j'avais décidé d'allé à la Bataille de Flieurs, et j'l'y d'mandit s'ou veindrait ôv mé. "Le Bram et sa dgaingue s'en vont dans lûs van," j'l'y dit, "et j'pouôrrons être portés là et rapportés dans notre bél."
"Nânin dja," ou s'fit. "J'y'ai tait une fais, et ch'tait une fais d'trop. Chein que j'trouvit dêgouotant ch'tait d'vais toutes chais belles flieurs que la Providence avait cru pour embelli at parfumé nos gardins, dêchithés dans tchiques minutes par une foule de monde tch'éthaient deu avé au mains un mais d'prison. Quant à té, vas-y s'tu veur, mais si tu prendre m'n'avis tu restéthas siez-té. Y'a d'la sérclye jusqu'au g'nou dans l'gardin, et il est grand' temps d'abattre le banc d'ortchis dans la cârre du p'tit clios, d'vant tchi sèment lûs graine. Le vraie en est, Ph'lip, que tu veur t'êcapper pour le jour et m'laisse à faithe tout l'travas."
Mais, Moussieu, j'y fut quand-même, mais d'vant sorti j'eut à netti l'êtablye, le poulailli et les cottes à couochons. J'eut même à donné un coup d'bringe au bél, et mettre une poule à couë. Quand j'eut fini, la Merrienne me bâillit ses beurrées, un gobin d'fromage et une bouteille de tais fraid, disant que ch'tait assez pour un homme tch'y tait bête asséz d'laissi sa ferme ès coucous pour s'en allé en Ville dêpensé des sous follement.
Pour vos dithe, Moussieu, je n'tais pas tout-à-fait de s'n'opinion au sujet des rafraîchissements, car si y'a rain que j'dêteste ch'est du tais fraid, et la Merrienne le sait bein, mais ou 'tait dêtérminée de m'puni, et j'n'ôsit pas dithe un mot. Mais quand j'arrivîmes à Beaumont j'accatit une bouteille de bièthe, et pûs tard le tais fraid dispathis par-déssus une muthaille.
J'avais creu que j'pouôrrais entre dans l'parcq et vais la Bataille sans avé à ouvri ma pouchétte, mais nânin. J'eut biau dithe au brigand à l'entrée qe je v'nais du Portinfé, et que j'tais Principa d'Pâraisse. Y n'voulit jamais m'laissi passée d'vant que j'eut donné une pièche d'êtchu, et j'n'ai jamais dépensé deux ch'lins et d'mi avec tant d'dêpié. J'tais ocquo d'bouonne heuthe et don j'm'assis sus l'hérbe à mangi mes provisions.
Bêtot ne v'la les vétuthes décorées tchi qu'menchent à arrivé, et bein seux y'en avait tchi 'taient hardi belles, mais pour dithe la véthité, je n'trouvais pas l'spéctaclye, a l'prendre yun dans l'autre aussi bé comme j'avais veu l'année passée, et surtout l'année de d'vant. Nous avait liut dans la Post que che s'sait tchiquechose de mérveilleux, mais quant a mé, j's'y bein seux que j'ai veu miyeu. Si j'avais yeu ocquo deustrais boutéilles de biéthe ou un lérmin d'cognac y s'peut qu'j'éthais changi d'opinion, car ou d'véz savé, Moussieu, que quand un homme a sé y n'est pas tréjous de bouonne humeur.
Quand je r'vint, bein seux, j'eut à raconté tout ch'que j'avais veu à la Merrienne. Ou fut bein contente d'entendre que nos jeunes férmiers avaient gâgni le Prix d'Honneur, et ou voulit savé tchésque j'avais creu de la Miss Battle of Flowers.
"Eh bein, ma vieille," j'l'y dit, "j'n'ai pas peut en appréchi tout près, mais par chein qu'j'en ai veu, y m'semblye que quand j'tais jeue homme y y'avait une hardélle dans l'fond d'l'Eta, et une autre dans l's'envithons du Creux Baillot tch'y y'éthaient donné des points. Ach'teu, Lundi y'a les courses."
"Vèthe," ou s'fit, faisant une grimache, "et j'pense bein qu'tu as idée d'y'allé, comme de couôtume?"
"Bein seux," j'l'y dit, "et chutte fais j'm'attends que y'étha pûs d'bidéts qu'nous a veu pour bein d's'années. Accordant à la gâzette, y'étha des g'vaux d'Angliétêrre et de Djernézi, et bein suex y'en étha d'ichin. J'ai d'la peine à craithe que l'Sénateur Troy n'étha pas tchiquechose de raide bouon là, épis y'a la famille Acourt, le Sieur Arthur, d'Sainte-Mathie, et p't'être le jeune Billot, d'Saint-Martin."
"Et sans doute, y'étha étout d'chais messieux-là tch'y sont tréjous prêts à prendre les sous de chais îmbéciles, comme té, tch'y gagent sûs des ch'vaux tchi n'ont pas pûs d'chance de gâgni que de volé à la lune," ou dit.
"Oh, je n'sais pas, Merrienne," j'l'y dit. "L'année pâssée, si ma bidet avait peut gallopé un mio pûs vite après avé touôné la dérnié cârre, y n'éthait pas fini chînquième hors de chînq. Y'a tchiquechose tchi m'dit que j'éthai miyeu chance ch't'année, car tan couôsin le Député l'Cornu, est seux d'être là, et nou m'dis tch'y sait pèsque tréjous tchèsqu'y s'en va gâgni. J'Ithai l'trouvé la preumié chose, et je s'sais bein surprînt si j'ne r'veins pas avec ma pouchette plienne de sous."
"Et mé," ou s'fit, se l'vant pour prépathé un mio d'soupé, "je s'sait bein surprinse si tu r'veins sans avé éxplitchi comment qu'tu'ès v'nu à pérdre chein que j't'avais donné d'vant t'n'allé."
Ph'lip
2/8/1958
Viyiz étout: