Notre hardelle voulait s'exhibité eunne fais dans sa vie,
Et ou'l avait biaux en pâslé, nou n'y prenait pas d'avis;
Eun jour ou s'en vint en dansant et en chantant:
Je m'en vais m'exhibité, le sav'ous, mes bouannes gens,
Je trouv'thait du monde à v'né avec mé,
Et j'nos z'n'allons à la bataille dans eun tralli et un baté.

Ou fis bein des pas et bein d'la trottie
Devant que d'être prête et bein ridgie,
Ou voulait avait l'air d'eunne vraie bretonne,
Et avec notre hardelle toutes choses s'y'adonne:
Ou'l eut mouochet d'co, shabots et nier devanté
Pour allé dnans san tralli et san baté.

Ou formi tout d'un coup un bouan parti,
Des hardelles et des gas qui voulaient bein yiêdgi:
Yieun des gas avé l'air du vier juif errant,.
Les aoutres, sans doute, étaient de ses pathens;
ll' avaient tous l'air des garçons de mé,
Dans lus tralli et lus baté.

Yieunne des fille tait à ouvré bein activement,
Eunne aoutre gardait la jougue bein assidument;
Notre hardelle, yi, tait bein active, en êffet,
Car ou'l avait le soin de r'grès le dranet,
Car eun prix ou voulait gâgni et avé
Pour san tralli et san baté.

Quand les juges vidrent arrivé l'êtchipage,
Des vrais paîtcheurs avec lus brun visage;
I' dirent: hélô! hélô! cheschin ne pathaissent pas mal,
Et pis i' n'y a pus d'ordgi, mais bein d'l'original;
Cheschin éthont un prix, à n'en pas douté;
Pour lus tralli et lus baté

Et pis ou'l entendit étout de ses propres ouotheilles,
I' lus en faout yieun étout pour le nonpatheil;
Le bon qui y-a en notre hardelle ou n'a pas d'ordgi,
Et ch'est justement chonna qui la saouvi;
Ch'est yi qu'était contente de s'en allé
Avec daeux prix dans san tralli et san baté.

L'humilitèt veint d'vant la gloiere.

Livonia