Les Pages Jèrriaises

How Mister Pain saw the Battle

Faudrait pourtant bin qu'j'ithaimes au mains nos montré sus l'Front ch't'arlevée, que j'dis a Laizé, Jeudi au matin. L'Counétab'ye d'la Ville m'a fait asavé qu'y'a du monde qu'ont dit qué ch'tait pustot pour nos vaie qu'ils avaient fait l'viage, et Moussieu Labey m'a envié mendaton qu'y'avait deux plieches pour nou sus sa carosse. Laizé hertchinnyi un mio. Son bouan fro avait eunne taque sus lé d'vant: les flieurs de san bonnette 'taient èsbliavés; y s'n'allait tchée d'la plyie dans son co, et ou n'criyait pon que je s'ait seuthabye de laissi Lonore toute seule sans persounne a viyi d'sus.

Tout d'mème, quand j'y'eut fait comprendre que toute l'Ile comptait sus nous; qu'sa plieche 'tait a mes cotés sus l'haut d'la bus a moussieu Labey ou s'décidit - a condition que j'lis tchindrais la main tout l'temps, j'amathimes Lonore - oul en r'gagne douochot'ment, sinon qu'oul est quazi tout l'temps a ésprouvé a sufflié des chansons d'soudard - j'l'amathimes par la gambe es pids d'san liet, et y'un d'simprimeurs promint d'ramonté s'il entendait du frédas tandi qu'je s'aimes dehort.

Nos v'la don sus la bus - après assez d'embaras, car Laizé avait grand peux qu'nou lis visse les gambes en montant l'èstchelle. - Ch'tait mé qui cachais. autou d'mé y'avait du monde habiyis a la mode du temps d'la Reine Elizabeth; Laize 'tait sus un banc, driethe, habiyie en papi, et ch'fut pas ma main qu'ou t'nait; n'y'avait pon moyen, pis que j'cachais. Ou n'avait pon l'air a s'naise ma pouore femme, y faut l'dithe, ou passi s'n'arlevée a empechi ses vaizins d'apprechi trop près d'yi d'crainte qui trillyisse san fro en papi; et quand vint la squalle de plyie ou fut'en l'heu coumme eunne chique. Nou la fit d'vallé ben vite, et après l'avé enfliubée dans un lincheu nou la fouorri dans l'interieur de la bus pour le restant d'l'arlevée.

Ch'fut not' vethuthe qui gagnyi le Prix d'Hounneu, coumme ou savez. A bon d'gens craient que j'sis quazi d'avis mé mème. R'mertchites-ous coumme je t'nais mes gambes raides endrét mé? coumme man fouet 'tait stiff dans ma main? et tchi bieau clioque j'avais sus l's'espaules? J'taimes seux d'avé un prix!

Quand la Bataille fut finie et nous rentrés a l'èstabye tout l'monde descendit d'san mus et nou but tchiq' verrées d'litcheu pour se rescauffé. J'm'en rallais trantchil'ment siez nous ov man fouet et ma casaque, quand tout d'un coup je m'souvins d'Laizé. J'ouvrimes ben vite l'hue d'la bus, et j'trouvimes ma femme accliutchie dans l'fond sus un fagot d'estrain,ben embarassée a èsrachi les miots d'papi tch'etait collés partout sus sa fache, ses bras, ses gambes. coumme la police nos ethait pon permint d'traversé la ville dans ch't'estat, j'la mins dans eunne cab et en arrivant la preumié chose qu'ou fit fut de s'déshabillyi et fouorre ses habits dans eunne traisie d'ieau pour fini d'èstrempé l'papi. Lonôre n'avait pon bouoji, mais ou n'chantait pon d'autre. Faut craithe qu'j'avais serré la corde un mio trop du car ou s'pliégnait d'avé des frémions dans les gambes et ou s'couochit sans voulé béthe eunne bollée d'lait caud dans tchi y'avait du rigolisse, et un p'tit verre de tormentinne - ch'est un vier r'miede de forgeux pour dèstouonné les sens des gens qu'ont y'eu les sangs touonées.

Piteur Pain
The Morning News 23/8/1912


 

Viyiz étout:

 

Les Pages Jèrriaises