Les Pages Jèrriaises

Suggestions

J'savons tous bein qu'en Jerri,
Ch't'année,
Une grand' Bastaude de Flieurs
Est fixée
Pour le mais d'Août tchi veint - je pense qué ch'est l'dghès-huit
- Ch'est quasi dans treis s'maines, mon doux qu'ch'là veindra vite.

Châtchun s'rappelle sans doute
Le succès
Qu'eut la Bastaude de Flieurs
La drainn' fais;
Biau solet et belles roses, belles vetuthes - et belles filles -
Ch'l'a d'vait bein satisfaith' la campagne et la ville.

Mais i m'sembl'ye que j'pourraimes
Innover
Et sus notre aut' Bastaude
Amendé.
Ch'est-en tchi j'men vais faith' deux-treis p'tites suggestions
Qué j'ruminais l'aut'jour en hallant des tchèrdons.

J'eunn' sait pas du tout pour tchi
Qué j'pensais
A tout chonna l'aut' jour,
P't'être que ch'est
Un but d'conversation - j'eunn sé pas déjà quand -
Que j'avais entendu entre deux-treis bouannes gens.

Jé cré quasi qué j'dev'thaimes,
Pour chutte fais,
Aver un autre programme.
J'voudrais vaie
Dé difféthents concours - d'un caractèthe local
Ché s'sait bein pus tchuthieux qu'un simpl'ye carnaval.

J'sais content d'vais d'abord
Dêfiler
Deux-treis tchéthettes à vraicq
Comme nou vé
Du bord dé la Pulente et du côté d'la Moye
Sinon qu'nou n'les appelle pus "tchéthettes" mais "hernais".

J'en éthais d'vièr sept ou huit
Décorées
Ov' dé belles pliantes de mé
Et des vraicqs
Et plises dé toutes les sortes, ov' un biau fouet d'colét
Et une frouque à long manche pour le sien qui cachechait.

Deux-treis hernais à êqu'lon
Essaient biaux
Avec dé l'incarnat
Es banniaux
D'la vèsche et d'la luzerne, et d'la moutarde en flieurs
Dé bliancs et jaunes mergots - y'en éthait d'la couleur!

Les querres des femmes à paisson
Graies d'feugièthes
Ov' les reux arrangies
Dé bruyèthes
Des vennes à pommes de terre, des p'tits hernais à lait
Ch'en s'sait une ribandelle - jamais n'na veu d'itèt.

Et pis j'voudrais vais d'l'antique,
Comme autr'fais.
D'abord des tchéthibots
Tout en boiès.
Avec des reux d'une plièche - sans springues ni féthailles
Traînés par des p'tits gh'vaux - avec des buorrés d'paille.

Lé sien qui s'sait à cachi
J'l'habillelais,
D'après la mode d'alors
Comme ils 'taient,
Avec un bonnet d'laine - une qu'minzolle dé molleton
Un biu fro à carriaux; ses qu'mandes s'saient du padon.

Je voudrais r'avé ètou
Des bachots
Comme autr' fais y'en avait
S'saient-i biaux?
Tout ch'la s'sait bein tchuthieux et pis ché s'sait si drôle,
Qu'les visiteurs veindraient en Jerri des deux pôles.

Une autr' chose ètou f'thait bein,
Magnifique,
Et en même temps ché s'sait
D'tchi antique.
Je pâle du temps d'jadis quand nou z'allait à ch'va
Etcherforchis, sans selle, avec un grand bissa.

J'empliéthais bein man bissa,
Jusqu'au haut,
De touffés d'flieurs sauvages,
P'tits et gros.
J'sis seux qu'dans la bastaude, en condisant man ch'va
Jé trouvthais bein moyen d'adèrchi chin'-et-là.

Les hardelles puorraient ètou
V'nin à gh'va
Et toutes les amazones
Qui s'saient là
Prenant d'un grand bissa d'l'ammunition fleuthie
N'manquethaient pas j'en sis seux d'être bein applaudies.

 

Elie
1904

 

Viyiz étout:

 

Les Pages Jèrriaises