Coumme nou peut pas aver tous des prix,
I' faout pas être jamais d'ézencouothagie
Si nou peut pas arriver les premiers;
I' faout bein qu'i' y-ait èttout des derniers,
Mais quand nou z-est bein persévérent
Nou y-arrive dans tchique temps.
Parce qu'i' y-avait unne démouaîselle qui lus dit:
Ch'est pour chouna, i' nou faout un prix, -
Ou l'est habituèe d'faithe de san mus,
Coumme nou dait faithe ès Avenues -
Là d'sus, Nicholas lui dit: "Y-es t-ous, garçons,
Si j'avons hardi d'fieurs, j'soummes bons.

Dès que la bataille fut co'menchie,
J'vos garantie que nos gens n'taient pas endormis.
Quand il' arrivirent d'vant lé grand stand
I' pitchirent des fieurs au son d'la band;
Savons bein qui y-en avait yun si réjoui
Qui tchi à quatre pattes dans l'mito du trolley.
Il avait perdu le stud des sa k'minse,
Tant pus qu'ils avaient de l'ammunition.
Ch'est l'temps qu'ils avaient le pus d'animation.

Dès que la bataille de fieurs fut finie,
I' n'en pouvaient pus, mais taient réjouis;
I' taient touos bein contents, en r'venant,
D'aver passé un bouan p'tit temps.
I' s'en r'vinrent sus l'trolley en ville,
Discutant la fête avec les jeunes filles.
Y-en avait yun qui voulait vés l'Caouain,
I' r'gardit partout, mais n'en vit rein.
Ou savèz, ch'est un ouaisé difficile à happé,
Qui n'veur pas vés ses pieumes sus un chapé!
Il tait muchi dans unne machinne à bagné
A r'garder trantchillement la mé.
Pour encuo vos faithe rithe
I' garde ses pieumes à êcrithe.

V'là qu'a mins les Trin'tais en fête
D'pis qu'il' ont gagni un prix d'pâraisse;
I' faout être r'connaissant ès d'mouaîselles
Qu'ont seut si bein lus tithé d'affaithe,
A aidgi à gagni un si biau prix,
Qui s'ra un souv'nir pour toute lus vie
Espéthons que les Trin'tais s'en vont continuer à exhibé
L'année tchi vein tchique chose de nouvé.
Pour de mé, l'coumitti d'la bataille de fieurs
Devthait donner pus de prix ès exhibiteurs,
Principalement pour la classe des pâraisses.
V'là qu'aid'rait à la réussite de la fête.
Et les douze pâraisses s'raient répresentèes,
Pour huit prix à gagni chaque année.
Ce s'rait un bouan encouothagement
Es siens qui contribuent si librement,
Et nou attirerait des visiteurs en Jerri,
Qui nos f'thait à l'avenir hardi d'crédit.
J'avons besoin de visiteurs dans l'été
A nos faithe du bein comme par le passé.
Mais i' faout jamais éprouvé à se distingi
En ayant de l'ordgi pour l'amour de gagni.

I' pathait que Samedi au sé à 9 heuthes et d'mie,
Dans tchi temps i' versait d'pyie,
Robert, l'inspecteur de la Crouaisserie,
Tait avec Charles en compagnie,
A prendre un bouan café royal
Qui fait hardi bein en général.
I' taient à distchuté le prix de la pâraisse
Que nos jeunes gens gagnirent à la fête,
Car i' s'en va être grand temps de décider
Tchi faithe du beou service à thée et à café.
Eh bein, mes bouannes gens, ch'est bein arrangi,
Parce que Mardi au sé i' rassemblites le coumitti
A décider tchi faithe du prix.
Les quatre démouaîselles en sont réjouis,
Nou lus dounne unne pièche du set à café.
Tch'est qu'nou éthait peut faithe de pus bé.
Ce sera un sôuvenir pour bein d's annèes
Quand veindra lus tour pour être mathièe.
I' s'ra bein tôt temps pour y-eux à lus décidé
Si veulent les mettre en ménage et à lus d'vé.
A touos mes vièrs anmins d'la Trin'té,
J'lus souhaite une bouanne santé,
Epéthant d'être un jour invité
A bèthe du thée dans yun des morciaux du set.
 

Caouain