A Mousieu l'Editeu.
Mousieu, - You qu'j'allons don? Pouorrê-t-ous nos l'dithe dans vot' gâzette de Samedi? Né v'la dé d'pis Mêcrédi qué la gestion d'nos deux Chantgniers est finie et nou n'ouait mot d'une êlection!
Jamais nou n'avait veu pathelle chose à St.-Où. La dernièthe fais, j'eumes deux êlections, l'une après l'autre, pour Député et chutte fais né v'la deux pliéches viéddes et personne ne bouoge.
Le Chantgni Hamon erprend-y? Né r'prend-y pas? V'la chein qu'tout l'monde se d'mandent.
Il est bain certain que l'Chantgni L'Brocq sé r'tithe pour bon, mais tchi qu'j'allons mettre à l'rempliéchi?
Ch'est là la question!
Touos les jours nou veint m'dithe le nom de tchic-un et pis le londemain j'entends qui n'en veur pas à autchun compte. Oquo anniét j'ai ouï qu'un certain nombre de nos gens s'en vont du bord de Morville. Nou m'dit que l'sien qu'est "establî" là est pris comme dans un "étau" car y n'aime pas à r'fuser à ses amis, mais il est solide comme un "cliou" et s'y prend, ch'la pouorrait tranchi la question car j'pense pas réelleent que l'parti du luothi l'opposéthait; ch'est un bouan homme, qu'a tout plien 'd'vie,' il est franc et y sat bain grée les choses comme y faut.
Y'étha-t'y êlection, ou non? J'n'y connais rein. J'sis trop vi achteuthe pour allé par la pâraisse querre les nouvelles et nou n'vein pon m'en dithe trop souvent.
Le sien que j'vos dit prendra p't'être. Si ch'est là l'cas, y vos le f'zont sans doute savé à la Gâzette et nou l'verra Samedi.
Votre obl'yigi,
Un vier Jeannot
8 Octobre 1908
Viyiz étout: