|
Ya presqu'un an qu'les Auvergnats, Qu'habitent St.-Ouen, D'mandirent à lus vier Connêtabl'ye S'i voudrait bein Ermettre sa main sus les vieilles qu'mandes Un fais oquoèthe Pour condithe comme i l'avait fait Hors des ornièthes En toute seutheté et sans verser Lé Hernais Municipal. Mais Mousieu D -, châtchant la tête: "Nannin, Merci." J'en ai veu d'pus d'une sorte, amins, Dé d'pis qu'j'y sis, Et jé n'peux pus t'nin bon les qu'mandes Dé vot' hernais, Qui va d'la Grève de Lecq ès Landes Et d'Grosnez au Mathais. Pour vos pliaithe même jé n'peux guider Le Hernais Municipal. Alors les St.-Ouennais, tristes et contrits: "Merci Mousieu." Pour chein qu'ou nos z'avez fait Jusqu'acheteu. J'vos asseuthons qué j'en sommes tous Bein r'connaissants. Et j'vos séthons bouan gré D'ichin chent ans, D'aver si bein condit Lé Hernais Municipal. Alors les St.-Ouennais, petits et grands, Se mettent sans d'lais, A cherchi tchic bouan homme qui piesse Guider l'hernais. I s'divisent en deux camps Les uns Luothiers Les autres, lus adversaithes, S'disant Rosiers. Tous d'mandent tch'est qu'chest qui conditha Lé Hernais Municipal. Le Luothi que vert toute l'année N'est pas longtemps D'vant mettre le nom de Mess Le Feuvre Bein en avant. Mais la Rose qu'est toute belle et fraîche Trouve Mess Hâcou Un bein bouan homme - Et touos deux disent Qui mettront d'dans Lus candidat - pour aver l'soin Du Hernais Municipal. Les sous cirtchullent - le commerce marche Et les bouteilles!! Les partisans d'un bord et d'l'autre Font des merveilles. Ils travaillent raidde dé d'pis des mais. Ch'est nièt et jour Quand veint la fin de la campagne Qu'i font lus tours Cherchant des voies pour l'homme qui mont'ta L'Hernais Municipal. Enfin l'jour d'la bataille arrive, Ch'est un Mardi; Et les bouannes gens d'la grand' paraisse S'animent hardi. Ch'est par chentaines que l'monde arrive Jusqu'à l'arène; Et chaque parti fait san possibl'ye, Tchi train qui mènent, Pour l'vé san candidat Dans l'Hernais Municipal. Yen a déjà betôt quatre chents L'tou du hernais, Chèst d'toute lus forche qu'i lèvent P'tit à la fais. Chent septante-chinq tchennent Mess Hâcou Et l'lèvent bein haut, Mais chent nonante-sept lanchent Le Feuvre D'un grand effort Raidde par dessus l'yun des banniaux Dré dans l'Hernais Municipal. Là, Mess Le Feuvre attrape les qu'mandes Dans l'tchéthibot, Au pliaisi d'touos bouans St.-Ouennais, Cache au p'tit trot, Sé bein prudent, ergarde ès pierres Et ès gros creux, Qu'tu trouv'thas tréjous par les qu'mins Mais n'aie pon d'peux Tchein bon tes qu'mandes et prend grand soin Du Hernais Municipal. Jeannot, junior. 4 heuthes 20, Mardi au sé Nouvelle Chronique de Jersey 19/8/1903 |
Viyiz étout: