|
Mess Bisson est à Portelet. Le craithait'ous? I' r'veindra brûlè du solei. Brun coumme un Maure et tout tav'lè, Mon Doux! Mon Doux! I' s'en alli Lundi matin, Coumme un moussieu! I' tchitti la ville sans chagrin En chapé d'paille et dans san fin La jouaie au tchoeu! Huit jours de temps sus les rotchèrs! Mais, pensez-y!! S'entet'nant ov les paissonièrs Et vivant d'homards et d'ormers. Engrais'sa-t-i! Laissant ses souliers sus l'sablion, I' varvot'ta Dans l'ieau, sans teurs et sans faichon, Et p't'être qu'i happ'tha du lanchon, I' nos r'ditha... I' verra mauve et cormothan Voler l'tou d'li. Et s'battre pour un mio d'fliaitan, Car i' sont coumme le ca' et l'tchan. A chein qu'nou m'dit! I' verra p't'être un houmme au vraic, Ov san hernais: Et l'y'aid'da p't'être dans tchic satchèt, Maniant la frouque ov habil'tè Dans ses djes daigts! A-t-i' prins sa have avec li? Je n'le sai' pon; I' n'voudrait p't'être pas trop s'mouoilli Et faut bein l'faithe ou rein n'pêtchi En fait d'paisson. Quand veindra l'ser, le chant du vent L'endormitha. Et che s'sa bein paisibl'yement Que lliain d'la ville et d'san tourment. I' ronfliétha!
|
Viyiz étout: