'Mais iou djâblyé qu'tas té ches dreinnes sémaines?', j'd'mandis l'aut' sé au Ph 'lip Desclios quand jé l'rencountri à l'assemblyée d'pâraisse. Car commue j'vos l'ai dit, y'a eunne pose qué jé n'l'avais veu. 'J'pensais qué p'têt' t'allais t'mett' sus les rangs pour Sénateu, et qu'tu 'tais par les c'mîns à tcheunter des vouaix'.
'Ouest qué j'tais?', s'rit l'Ph'lip, pas trop d'bounne humeur, 'j'tais dans mon sohyi à mâter mes patates. Le pèrrot qu'j'avais embauchi's s'en fut en ville eunne séthée et i's'quétillyi avec eun Irlandais dans la Rue des Sabliouns. Il fut mîns au cliou pour trais mais, tchi fait qu'j'ai ieu à mâter mes patates mé-même'.
'Mais j'lis dis, 'tu dévrais être countent. Pense ès sous qu' t'as sauvé. Si t'avais dounné tes patates à mâter v'là tchi t'érait couâté pus d'vingt louis les chent bouêtes, tandis qu'v'là tchi n't'a couâté rein, et pense étout au plaisi qu'ous avez ieu, té et ta buonnefemme, à loundgeur dé séthée là-haut dans l'sohyi. V'là tchi vaut autrément mus qué d'être assis dans l'parleux, ciutés d'vaut la télévisioun, à r'garder du niolîn coumme Bergerac'.
'Heu'! s'rit l'Ph'lip, 'siez nous j'n'érgardouns pas d'itelle saloprie. Mais quand tu verras ma bounnefemme au sohyi à mâter des patates tu pouarras vraiment dithe que t'as veu eun miraclye! Même quand ou' té garse n'y'avait autcheun moyen d'la faithe mounter au sohyi. Ou disait qu'ou d'v'nait toute êtourdie s'ou mettait l'pid sus eunne êtchelle. Mais, lé-v'là, les femmes sount d'même. Et acquo il nos disent qué j'dévraimes en aver acquo pus dans l's Etats! S'il d'veinnent trop êtourdies pour mounter au sohyi coumment dgiâblye qu'il s'en vount garder la tête parmi touas ches gailliards dans l's Etats? Mais, pâlant d's Etats, dis-mé as tu veu dans la gâzette qué s'en va y'aver du rêvillioun les préchainnes êlectiouns?
Il parait qu'i's'en vount former des partis, les euns payis par le tourisme, d'autres par les fripouns - ah, j'veur dire par les grands financiers - et d'autres acquo par jé n'sais pas tchi, mais chein qu'jé m'd'mande chest si j'allouns aver étout eun parti jèrriais'.
'Mon Ph'lip', j'lis dis, 'tu t'emportes. Tu traites les grands financiers dé fripouns. Y'en a bein seux qui l'sount mais, mé, j'dirais pustôt qu'les grands financiers ch'est des messieu's qui n'pensent pas trop au Buoan Djeu quand il sount à faithe lus coups. Mais tu pâlais d'un parti jèrriais dans l's' Etats. En êffet, j'en avouns grand bésoin. Mais, tu vai, eun parti jèrriais peut aver coumme membres des gens qui n'sount pas Jèrriais. Chein qui counte ch'n'est pas ouesqu'i' sount nés mais tch'est qu'est lus attitude envers lé vrai Jèrri. Par exemplye, y'a bein des membres d'la Société Jèrrsiaise qui n'sount ieux-mêmes pas Jèrriais mais qui travaillent pus pour lé beinêtre dé Jèrri qué né l'fount bein des Jèrriais. Et il n'est pas difficile d' les démêler: nou' dècouvré bein vite les siens qui vivent ichein parc'qu'il'aiment Jèrri et veullent lé préserver, et l'autres qui n'sount ichein qué pour remplyi lus pouchettes ou pour s'êcapper des taxes angliaiches. Les siens qui sount d' not côté j'dévouns lus faithe la beinv'nue et être ermérciants d'lus aide. Y'en a même tchiques euns qu'aiment tant le vrai Jèrri qui tâchent d'apprendre lé jèrriais. Ches gens-là, qui s'saient angliais, écossais ou même chinouais, Il sount nos amîns et j'avouns bésoin d'ieux. Car vé-tu...'
Mais L'Ph'lip m'interroumpit: 'Tchi qui t'a prins, té, à ces sé? A t'oui' pâler nou dirait qu't'est en chaise. Si les viers t'avaient entendu sérmounner d'même il'éraient dit: 'I' pâle bein, ch'ti-là, il sah faller li mett' la rouoge robe.'
Viyiz étout: