L'Êlection finie et les vouaix bain comptè's,
J'alîm's bère un coup siez notre anmin D'Caen,
Et chêqu' j'y brâlîm's-t-i coum' des rafolès,
En beuvant à la bouann' santè d'Maît' Jean.
 Mais lé pus bé du jeu fut quand j'l'eûm's jutchi
Sus nos êpaul's, èt qué, coume un héro,
Jé l'portîm's en triomph' pus d'trais mils èt d'mi,
Aux cris erpètès dé "Viv' Jean Cabot !"

Mais tout n'est pas fini : lé Sam'di d'oprès,
Ch'est au chain qui s'mètra souos san bouan fin ;
Pour agangni jusqu'à la Cour, pour y vès
L'Asermentâtion dé Jean "not' couôsin."
- Mais v'nouos-en à La Bouctérie, mes garçons ;
Car j'somm's invitès à un s'cond fricot : -
Bâfrons èt supons, èt dé touots nos poumons,
Criyons à rèd'brach': "Viv', viv' Jean Cabot !"

Tchiqu's jours oprès, not' Connêtabl' fut prins d'ma -
I-l-avait la Cocluche ou la Rouojeul' ; -
Les Etats alaient s'asembié, èt coum' chlà
Maît' Jean fut priyè d'remply san fauteul.
I-l-y fut, - èt ch'qui y a d'pus, i-l-y pâlit, -
Et i-l-érait occouo bain dit un mot ;
"Mais j'craindrais d'corompr' Mousieu Godfray," dit-i,
Et tout l'mond' criyit : "Bravo ! Jean Cabot !"

L'aut' jeu occouo, not' Chef paigniolait un p'tit,
Et Jean filit ès Etats coume un fo ;
I-l-y d'saprouvit d'eun' loué èt "corompit"
Mousieu Godfray, qui s'en asît tout sot . . . .
Lé Députè n'trouvit rain à 'rdir' dé chlà ;
Chain qui l'fît bouoyonné d'rag' - en un mot -
Ch'tait d'entendr' dé d'dans chut maudit' gal'rie-là
Ché espiègl's crié : "Bravo ! Jean Cabot !"

Maît' Jean, pour nous est un houm' infatigabl'
I nos a montrè ch'qu'un Chant'gni peut fair', -
S'i-l-'tait pus . . . . d'vinèz dé chain qu'i s'rait capabl' . . . .
S'i-l-'tait Députè ou . . . . Chut'! I faut s'tèr' . . . .
Chain qu'i y a d'seux - èt qui s'dit partout Jerri -
Chêqu' jeanmais j'n'avons yeu un 'té ergot
A nos 'rprésenté ès Etats, - ch'est pourtchi,
Criyons ov' tout l'mond' : "Bravo ! Jean Cabot !"

Un Jerriais jusqu'à la Hérèque du Dos.
Lé Huré, chu 11 Janvi 1862.