San Antonio, Texas,
U.S.A.
Le preunmyi d'janvyi, 1972.
Moussieu l'Rédacteu,
Eh bein, bouannes gens, nouos r'véla au preunmié jour dé l'an et j'vouos souhaite eune raide bouanne année à tous, eune année tchi, j'l'espéthe, es'sa la milyeuthe qu' ou-s-avez ieu. Mais, par dessus tout, eune bouanne santé. Ch'est là l'prîncipa.
La dreine gâzette èrchue d'Jèrri est la cheinne du 4 novembre. Ou nouos annonce qué l's emplyiyés d's Êtats 'taient pour aver quat' jours dé vacances à Noué. La gâzette né l'dit pon, mais j'pense bein tch'i' s'sont payis quand mème. Tchi chance! En sont-i' r'connaîssants? Ch'n'est pon ravissant tch'il en couôte tant à vivre!
J'vai qué l'Député de Veulle a d'la peine à aver l's Êtats à lî'aîdgi à consèrver la Zone Vèrte tch'est si d'sithabl'ye, lé tou d'l'Île. Si les bâtisseurs dé maisons 'taient pèrmîns d'en bâti à lus gré, i' n'y éthait pus rein d'vèrt dé restant dans l'Île. Et, sans doute, ch'n'est pon la faute entchiéthe du bâtisseux - i' n'faut pon oublyiyer l' Moussieu Angliais tchi veurt pliaichi ses sou pour en faithe acouo pus.
Ch'est drôle, mais un bouan Jèrriais, né dans san vaîsinné comme ses anchêtres dévant li pour tchiques chents ans, n'est pon Moussieu dans l'idée d'ses vaîsîns, mais si un Angliais, rein-tchi-vaille ou autrément, veint dans l'vaîsinné il est tout d'suite mentionné comme Lé Moussieu Angliais!. I' faut en mème temps avouer tch'i' y'a un tas d'vrais mêssieurs parmi l's Angliais tch'ont 'té d'meuther en Jèrri, et tch'il' ont amendé supèrbément les propriêtés tch'il' ont acaté, mais comme vièrs Jèrriais nou n'aime pon vaie les maisons d'fèrme touannées en hôtels et les clios loués îndividuellement, et les p'tits troupieaux d'bêtes à cornes dispathaître. Mais né v'la chein qué l'tourisme nouos a apporté. Tch'est qu'éthait creu qu'la vie en Jèrri pouorrait changi d'mème?
Eune chose èrmèrquabl'ye est qu' les St. Bréladais sont dév'nus si Chrêtchiens, quâsi d'un jour à l'autre, tch'i' faut trais neuves églyises ès Tchennevais pour lus bésoins spirituels! La gâzette nouos montre un portrait d'l'églyise êvangelique en trains d'êt' bâtie, et nouos annonce qué l'églyise romaine s'en va en bâti ieune étout, et qu' un Anglican-Methodist Communicaire (jé n'sai pon trop bein tch'est qu' chenna veurt dithe!) s'en va p't êt' bâtie dans l's envithons. Eh bein, nou peut comprendre qué les Méthodistes ont bésoin d'eune chapelle dépis tch'il' ont pèrdu Tabor, mais y'a tout pliein d'run dans l'Églyise Pârouaîssiale pour les Anglyicans n'împorte dans tchi partie d'la pâraisse tch'i' d'meuthient. À ch't heu tch'il' ont peux d'marchi deux pas et tch'il' ont touos des motos i' peuvent cachi à La Baie dans mains d'eune démi'heuthe pour aller à l'églyise. Et i' dév'thaient en être ordgilleurs, dé lus églyise. Oulle est la pus vielle, et cèrtainement ieune des pus belles, dé l'Île. À m'n idée, i' n'y a autcheune raison pour en bâti eune autre (Anglyicanne) ès Tchennevais, sénon qu' ch'est eune pèrte d'sou et qu' les gens d'à ch't heu pathaîssent vouler les gaspilyi, les sou!
Né v'chîn eune idée : À la pliaiche dé bâti d's églyises tchi s'sont vièdes la maîntchi du temps - mème au Dînmanche - pourtchi n'faithe pon sèrvi les sou pour èrgraie les bèrrexes d'La Gréve dé Lé pour lé bénéfice des malades à Madanme Ashton-Edwards?
Vouot' articl'ye d'font au sujet dé donner l'drouait d'voter ès jannes dé 18 ans est admithabl'ye. Ch'est vrai qué si un garçon peut êt' appelé à s'battre et p't êt' pèrdre la vie pour san pays, i' dév'thait aver l'drouait d'voter. En Jèrri, v'la tchi n'dév'thait pon faithe grand' difféthence dans autcheune cas, ouaithe qué nou sé d'mande, quand nou vait les jannes garçons atout des longs g'veux et habilyis comme des êpeûthas, s'i' y'a grand' sorte d'chèrvé drièthe ches g'veux-là! J'avons l'mème problème en Améthique, mais les partis politiques sont à faithe dé lus mus pour en profiter, et ch'est l'parti tchi s'en va pouver dêpenser l'pus d'sou, et travailli l'pus dû point d'veue d'propagande, tch'en gangn'na. Y'a crainte qué les Consèrvateurs éthont mains d'chance d'en gangni. La jannèche est pûtôt intérèssie à boulevèrser l'ordre êtabl'yi. Ch'est assez drôle quand nou veint à considéther qué l' Êtablyissement des choses ichîn est responsabl'ye pour aver crêé un système tch'a fait l'Améthique lé pus prospéthe pays au monde! Mais les jannes né pathaîssent pon pouver vaie pus liain qué l'but d'lus nez!
Nou n'peut pon bliaûmer l'Connétabl'ye L'Breton d'St. Sauveux pour vouler garder les frais des Victoria Cottage Homes à bas autant qu' pôssibl'ye. Nou sait bein qué nou n'peut pon empêchi les gens d'visiter pathents et anmîns tch'y d'meuthent, et ch'est bein seux qué l'Connétabl'ye li-mème est dé ch't avis-là étout, mais i' faut mett' la raison dans tout, et dêpis qu' les méthitouaithes y d'meuthent pour rein i' dév'thaient aver l'avis qué l'méthite démande l'êconomie des sou du publyi étout!
George d'La Forge
Viyiz étout: