San Antonio, Texas,
U.S.A.
Lé 11 janvyi, 1969.
Moussieu l'Rédacteu,
À m'suthe qué l'temps s'passe, nou sé d'mande où'est qué l's'années s'envolent! Nouos v'la dêjà avolée dans la nouvelle année, et i' sembliéthait tch'i' n'y a qu'tchiques jours qué nou 'tait à mett' l'arbre d'Noué dans la cârre du parleux pour donner eune chance à Papa Noué dé l'trouver d'amain quand i' d'val'lait la cheunm'née auve sa poutchie d'jouëts. Papa et Manman m'avaient dgèrni tch'i' n'fallait pon faithe la minne dé l'vaie quand il arrivethait, car il aimait vaie touos les mousses endormis tranchilement viyant tch'i' n'avait pon l'temps d'rester à lus pâler! I' savaient bein, sans doute, qué l'dormi m'arrivethait d'vant l'arrivée d'Papa Noué, et quand j'mé rêvilyais l'matîn j'mé d'mandais pour tchi dgiâtre qué j'm'étais, endormi si vite! Enfîn, la jouaie d'trouver la cauche plieine d'oranges et d'codrettes et p't êt' tchiques pétits jouëts (l's anciens n'taient pon bein riche et n'pouvaient pon acater les bieaux jouëts qu'nou vait par les c'mîns à ch't heu!) vouos faîthait oublyiyer l'dêpiet d'aver mantchi à vaie Papa Noué!
À m'suthe qué nou vieillis, nou pense à la jouaie qu'ches temps-là d'jannèche pouvaient vouos apporter, et nou n'peut qu'penser - p't êt' auve eune ombre d'èrgret - qué, dans la vieillèche, l'arrivée d'Noué sîngnifie qu'acouo eune aut' année veint d'êt' ajouôtee ès quâsi huiptante qué nou-s-à dêjà veues! Né v'là l'temps qu'nou c'menche à rêaliser qu'ch'est pûtôt dans l'chant d'l Adeste Fideles dans l'sanctuaithe dé l'églyise qué nou r'sent la vraie jouaie dé r'vaie acouo un aut' annivérsaithe dé la supèrbe fête de la Nativité dé Notre Seigneur Jésû Chri. Enfîn, né v'la dêjà un tchièrs du mais d'janvyi d'passé et nouos r'véla en c'mîn pour lé préchain annivérsaithe, et, si nou-s-en vait l'heuthe, i' nouos r'tchèrra sus l'co d'vant qu'nou s'en appèrchève! I' faut au mains êt' èrconnaîssants d'aver veu l'drein, et vivre en espéthance dé vaie l'prêchain et d'aver la santé pour jouï d'la vie en l'attendant!
Lundi passé - l'six d'janvyi et l'chent huiptante-huitième annivérsaithe dé La Batâle dé Jèrri - m'faîthait penser à ch't êpoque-là dans nouot' pétite île, et j'êrprouvais à vaie, dans m'n idée, L'Vièr Marchi d'chu temps-là atout sa vielle cohue et sa crouaix en pièrre où-est qu'la statue est à ch't heu. Tchi jour tragique pour les Jèrriais d'mil sept chent huiptante-ieune! Ouaithe qué l'nombre d'tués dans chutte pétite dgèrre-là n'est rein à compather ès nombres d'Jèrriais abattus dans les grand' dgèrres dépis, y'avait quand-mème du deu dans tchiques maiethons, et ch'est seux qu'les ridgieaux 'taient bas et qué l'crêpe fut porté pour tchiques années par les femmes. Et j'pensais au p'tit nombre d'rues dans la ville dé St. Hélyi à ch't êpoque-là, et j'me d'mandais si les soudards dé la Milice ou les rédgulièrs Angliais assembliés sus L'Mont d'La Ville pouvaient vaie tch'est tch'i' s'passait dans l'Marchi d'vant d'scendre pour sé mêler dans la batâle. Tch'est qu'jé n'don'nais pon pour pouver vaie l'vièr Jèrri d'chu temps-là atout ses maiethons couvèrtes en glyi et la feunmée monter trantchillement par ses cheunm'nées comme dé l'enchens vers les cieux, et ses p'tites rues encombrêes pûtôt par du ponsi (et p't êt' malheutheusement par du pité dans l'hiver!) qué par des motos!
Et j'mé d'mandais combein tch'i' y'avait d'gens dans chu pays-'chîn d'deux chents millions d'habitants tch'avaient autcheune idée qu'La Batâle dé Jèrri avait ieu lieu, et combein tch'i' y'en avait parmi les Jèrriais tch'y d'meuthent tch'avaient pensé a s'n annivérsaithe! Quant ès Améthitchains, i' n'faut pon oublyiyer tch'i' ont lus peines et lus mînséthes comme tout l'monde. Y'a ieu pus d'trente mille hommes dé tués à la dgèrre du Vietnam, et ouaithe qué les femmes et les méthes né mettent pon d'crêpe i' n'en sont pon mains dans l'deu. Et pis, étout, nou n'peut pon s'attendre tch'i' s'en vont aver autcheune idée d'La Batâle dé Jèrri quand la grand' majorité n'sait mème pon pour tch'est que L'Nouvieau Jèrri est nommé d'mème!
Mais, pour érvénîn à la mémouaithe des vièrs temps. Ou-s-allez p't'êt' mé dithe que ch'est pus d'sithabl'ye dé penser à l'av'nîn qué dans l'passé. Eh bein, ou-s-avez p't êt' raiethon, mais quand nou vieillis en exil, les idées viagent souvent au pays d'naîssance et, si nou-s-a l'temps d's'assiéthe trantchilement à reunminner nou trouve qué chu viage-là èrsembl'ye à un bieau p'tit rêve et qu'en l'rêvant nou n'aime mème pon l'idée d'aver à s'rêvilyi!
George d'La Forge
Viyiz étout: