San'mdi, l'20 dé décembre, un sèrvice dé neu léçons et d'cantiques dé Noué eut lieu dans l'Églyise dé St. Jean et dans les 140 membres lus y rêunitent.

L'Sieur E. B. de Gruchy fit la beinv'nue à tous et annoncit l'preunmyi cantique, Dans les cieux et sur la terre, et auprès fit la priéthe et l'sèrvice continuit sans arrêt.

Les neu léçons fûtent liues par les membres suivants: L'Sénateu P. J. Romeril (Président), la Dlle. K. Le Boutillier, l'Député W. Tomes, Mde. P. Green, l'Sieur L. L. Huelin, Officyi des tèrres des Êtats, l'Connêtabl'ye R. H. Le Cornu, Mde. Emma Le Mottée, l'Députe P. de Veulle, et l'Sieur E. B. de Gruchy. Auprès la siexième et septième léçon la Dlle. Ruth Amy chantit Petit Âne et Lé Fis d'Marie auve tous à joindre dans l'èrfrain. Y'avait du chant dans touos les cantiques auve lé Sieur George Baudains à l'orgue. Tous pouvaient entendre les léçons qu'avaient 'té si bein liues par les membres dé L'Assembliée. Lé Rév. P. G. Manton fit la Bénédiction.

Auprès l'sèrvice les membres fîtent c'mîn pour la Salle Pârouaissiale pour la rêunion mensuelle. D'vant c'menchi, l'Président d'mandit ès membres dé lus l'ver et observer eune minute dé silence en mémouaithe du Sieur F. Hinault. Lé rapport du mais d'novembre fut liu et accepté, et trais nouvieaux membres fûtent êlus.

Les affaithes finies, des rafraichissements fûtent sèrvis à tous par lé Conmité Dramatique et d'autres membres.

Lé Sieur McLaughlin, du B.B.C., qu'était v'nu pour faithe un r'cord, halit les neunméthos pour la râfliéthie.

Mde. Eileen Le Sueur èrmèrcyit tous qu'avaient aîdgi sus autchun sens, à liéthe les léçons, chanter et auve lé souper.

Lé Président èrmèrcyit l'Rév. Manton, lé Conmité Dramatique et lé Connêtabl'ye pour la salle et souhaitit à tous un Bouan Noué et eune Bouanne Année et annoncit qu'lé dîner annuel étha lieu jeudi, l'29 dé janvyi, à l'Hôtel des Arches, lé prix des billets étant 30/- tchi s'sont à vendre du 10 au 24 dé janvyi siez l'Trésôryi, l'Sieur J. N. Richard (North 236), et à l'office au Sieur Maillard.

Lé Sieur F. Le Maistre, d'la part dé touos les membres, souhaitit les Complyiments d'la Saison au Président et sa danme.

1969

Viyiz étout:

L'Assembliée d'Jèrriais