San Antonio, Texas,
U.S.A.
Lé 20 d'dézembre, 1968.
Moussieu l'Rédacteu,
Il est temps d'env'yer les complyîments d'la saison à touos l's anmîns en Jèrri et ès cheins tchi d'meuthent à l'êtrangi. Dans les temps d'Noué, j'ai tréjous envie d'monter à bord d'un avion pour m'en aller l'passer en Jèrri et aver l'pliaîsi d'aller siez les vaîthîns danser et chanter et jouer à conter l's êtailes et ès jeux du temps passé, et embraichi les jeunes filles souos l'dgi tchi 'tait pendu au haut dé toutes les portes ouvèrtes. I' faîthaient la minne dé n'vouler pon êt' embraichies, mais i' n'lus sauvaient pon! Tchi belles séthées qu'nou-s-avait pour deux-s'trais s'maines dans chu temps-là! J'y pense souvent, à ches séthées-là, car j'vai du dgi partout sus les bouais ichîn au Texas. Y'en a tant qu'les gens sont oblyigis dé l'coper touos l's ans pour sauver la vie des bouais car v'la tchi hale dû sus la sève. Lé dictionnaithe Jèrriais nouos dit tch'i' y'en avait tout pliein sus les pommièrs en Jèrri dans les vièrs temps, mais jé n'mé r'souveins pon d'en aver veu - mème quand j'tais tout mousse.
En reunminnant entouorre ches fêtes-là du temps passé, i' m'veint à l'idée qué Noué n'est probabliément pon d'mème en Jèrri à ch't heu. Il est probabl'ye qué les vaîthîns n's'entr'connaissent pus dépis qu'tant d'ieux sant dreinement v'nus d'Angliétèrre. Et pis, y'a tant d'distractions tch'aîguent à passer l'temps d'nouos jours qué les gens n's'entr'hantent pon au sé comme dans l'temps jadis.
J'aimethais bein pouver r'vénîn ès touos vièrs temps quand Noué 'tait prîncipalement eune fête réligieuse et qu'l'églyise attendait fête toute l'année pour célébrer la naîssance dé Notre Seigneu Jésus Chri et d'annoncer solonellement qu'un Sauveur 'tait v'nu au monde. Y'a appréchant d'deux mille ans qué l'preunmié Noué fut célébre et qu'cèrtains des grands d'chu temps-là suivîdrent la belle êtaile tchi les condisîdrent à Bethléhem pour rendre homage au P'tit Êfant r'connu comme étant L'Messie attendu.
Nou-s-éthait pensé qu'un êvènement si împortant éthait apporté l'bonheu à tout l'monde, mais ouaithe qué l'églyise nouos l'ramémouaithe touos l's ans, les gens n'pathaîssent pon prendre l'affaithe dans san sens spirituel. Et ouaithe qué l'églyise a prêchi l'êvangile du Christ pour deux mille ans, San c'mandement d'aimer san préchain comme sé-mème n'a pon ieu l'êffet d'aboli les disputes entre les gens ni les dgèrres entre les nations. Ichîn, en Améthique, la mauvaîtchi empiéthe touos les jours et touos l's ans. Y'a pus d'malfaiteurs par les c'mîns, pus d'assauts, d'viols et d'vol'lie qu'janmais. La police est au m'sespé et les cours dé justice ont d'la peine à s'garder au ras. J'pense que ch'est un mio la mème chose dans bein des pays. Quand j'tais en Jèrri dans l'êté, la gâzette donnait des nouvelles des vols, mème en Angliétèrre, dans les banques par des malfaiteurs auve des pistolets!
Les jannes gens dans nouos univèrsités sont en grève ou à faithe dé l'embarras à lus maîtres la maîntchi du temps à la pliaiche d'être à êtudier. Mème la France a ieu la mème turlute - et l'Mexique étout. Les travailleurs veulent travailli mains et gangni pus, et tant pus qué l's heuthes dé travas sont racourchies, tant pus d'temps tch'il' ont à rein n'faithe, à dêpenser lus sou et penser mêché. Y'a pus d'richesses qué janmais, mais l'gouvèrnément à Washington est oblyigi d'passer des louais pour soulagi les pauvres. I' n'a pon apprîns l'diton qu'nou n'peut pon enrichi un publyi!
Y'a ieu chînq ou siex dgèrres dans l'couothant d'ma vie - dé tchi ieune est acouo en allant, et des jannes Améthitchains et d's Australiens sont tués sus l'camp d'batâle touos les jours. Quand les r'présentants des nations en dgèrre lus rencontrent i' n'peuvent mème pon s'accorder au sujet d'où'est tch'i' s'en vont s'assièthe s'en pâler d'tchitter à s'entr'quétilyi et êtablyi la paix!
Ieune des choses qué j'ouïyais ch't êté quand j'tais en Afrique est que l'Chrêtchienisme n'en gangne pon là-bas. À c'menchi, l's Afritchains veulent lus défaithe des gens tchi n'sont pon d'lus couleu, et i' considèthent lé Chrêtchienisme comme étant la réligion d'l'Occident. Les Mahométans, r'cliamant qu'lus réligion est orientale, sont à faithe des progrès ênormes parmi ieux. V'la tchi n'a pon d's'encouothagi les Salutistes et les missionnaithes tchi sont là-bas à faithe eune oeuvre d'charité et un supèrbe travas parmi l's aveugl'yes, l's estropiés et l's enforteunés d'ches pays-là!
Ch'est 'chîn l'temps d'faithe tout dans nouot' pouvé pour encouothagi toutes les bouannes oeuvres et d'êprouver en montrant l'exempl'ye sé-mème, à donner pus d'aîgue à nouos églyises et les fréquenter pus souvent, et d'faithe les jannes aller à l'êcole du Dînmanche à la pliaiche dé couorre les c'mîns en moto duthant l'heuthe du tchulte. Eune habitude apprînse quand nou-s-est janne est apte à s'pèrpétuer quand nou vieillis, et l'temps d'Noué, annivèrsaithe dé la naissance du Seigneur est un bouan temps pour quémenchi à l'apprendre ès jannes tchi s'en vont être les grand' pèrsonnes dé l'av'nîn!
George d'La Forge.
Viyiz étout: