Portînfé, Saint Ou.
Mardi au sé.
Moussieu l'Editeu,
J'erquémenche agniet avec le temps, mais ch'n'est pas la même histouaithe comme la s'maine pâssée, car le jour a 'té si bé et caud que nou-s-avait d'la peine à l'craithe. Tout l'jour les ouâisieaux ont chanté à crever lûs poumons. Dans l'gardîn tout craît, et craîtrait même mûs sinon pour les fichus lapîns, tchi multiplient mà une vitêsse presque încriyable. Tchi bonheur, Moussieu, que l's humains n'ont pas chutte facilité, ou bein i' n'y éthait pas d'run bétôt pour la maintchi.
La séthée de l'Otchupâtion le temps était exactement comme à ces sé - pas un brîn d'vent et rein pour vos annoncer les chînq ans d'mînsèthe que Jêrri éthait à enduther. Nou voudrait l's oublier chais chînq ans, mais nou n'peut pas oublié, par exemplye, que nou 'tait prèsque sans tcherbon, et qu'à cause de chonna nou-s-allait s'couochi d'bouonne heuthe. Je n'ai pas tréjous accordé avec ma bouonnefemme, mais dans chu temps-là, nou-s-allait s'couochi de bouonne heuthe, et j'tais bein content de m'appréchi tout près de ma Merrienne, tchi étout, 'tait bein contente de s'appréchi d'mé. Comme chonna j'pouvaîmes nos garder cauds, et si, quand v'nait l'matîn, ch'tait mé tchi d'vallais dans la tchuîsine, ouèsque en hivé i' faisait une fraid d'tchan, eh bein, Moussieu, je l'faisais car j'savais que ch'tait man d'vé, et je n'le jamais r'gretté.
Quand vînt un temps je n'avions prèsque rein à mangi et j'tiomes des véthitablyes stchelettes. Si j'avais yeu m'n arme, j'éthions peut vivre sûs des lapîns, mais j'n'avais pas d'arme, et si j'l'avais muchie et que j'avais laîssi couôre un trait d'arme, ch'est seux que j'éthais 'té plianté contre une muthalle et tither, et Moussieu, je n'avais pas idée de tchitter chu monde d'la sorte, car ichîn au mains nou sait ouèsque nou-s-est, quandi que l'autre côté nou n'sait pas.
I' pathait que n'ya pa assez d'lard dans l'Ile, et à cause de chonna une cartchaison d'une quarantaine de jeune truies ont 'té împortées. S'i' donnent autant de p'tits comme nou-s-attend, tout dév'thait aller bein. Ch'n'est pas probabl'ye tchi s'en vont mantchi à lûs d'vé.
À ch'teu', Moussieu, deus-trais mots au sujet du Tourisme. Nou-s-entend que y'a tout prospect d'un été même miyeu qu'jamais, et les hôteliers et tout l'restant sont à embélli et aggrandi lûs prémisses. Eh bein, i' faut lûs soushaiter tout succès, mais j'crais quand-même que l's Etats dév'thaient limiter l'nombre, car i' m'semblye que y'en a dêjà assez, et pûs qu'assez.
Nos fermiers vivent en espéthance que ch't'année s'en va être miyeuthe sûs touos les sens que la draine, et je n'crais pas, entre nous, qu'ou pouôrrait être hardi pièthe. Nou n'peut pas nier que y'a hardi de couôtage et pas d'profit pour dithe comme les choses vont, mais chein qu'est seux et certain, et j'l'ai dit bein des fais, ch'est que Jêrri n'peut pas s'pâsser d'la têrre et des gens tchi la cultivent. Ou pouôrrait s'pâsser du Tourisme, même des Etats si l'fallait, mais pas d'chein tchi crait dans la têrre. J'si certain, Moussieu, qu'ou-s-êtes avec mé sûs chu point-là. Jé n'sais s'ou-s-êtes étout en faveur de chais chents neuves maisons ès Tchennevais. Le couôtage est estîmé à un million de louis, mais chonna ne couvritha pas tout d'un bieau but. À bétôt.
Ph'lip
Jersey Weekly Post 15/2/1964
Viyiz étout: