Souaixante Ans d'Libéthâtion, Libèrté et Opporteunité: eune Célébrâtion Spéciale
Viyant qu'Jèrri n'est pon bein liain d'la France mais s'trouve à eune pus grande distance d'la Grande Brétangne, j'avons un riche héthitage auve ses réchinnes dans la louai et la tchultuthe Nouormande mais tch'a 'té tchultivé auprès d'la Couronne Angliaîche d'pis 1204.
Not' pliaiche au large d'la Grand'-Tèrre fut la raîson pouortchi qu'les soudards fûtent èrtithés avant l'Otchupâtion par l'armée Allemande. Des mille Jèrriais fûtent êvacués au Rouoyaume Unni, un fliotchet d'gens fûtent dêportés contre la louai en Allemangne, et hardi d'nos gens sèrvîtent dans les Forces Armées, bein au liain d'lus fanmil'yes et d'lus siez-ieux. Les cheins laîssis driéthe fûtent en êffet blioutchis pouor chînq ans par l's Allemands, sans pouver commeunitchi auve lé restant du monde, sans pouver tchitter nitout.
Lé lian spécial auve la Couronne Angliaîche avait tchiquefais modéthé l's attitudes des Allemands, sénon les piéthes êffets êconomiques d'eune isolâtion sans pitchi et un gouvèrnément êtrangi. Jèrri avait changi ênormément et la Libéthâtion en 1945 fut la pus grande journée d'not' histouaithe pouor les cheins tchi la têmouongnîtent. Né v'là pouortchi qué j'mèrtchons chutte Libéthâtion-là châque année lé 9 d'Mai.
La souaixantchième d'la Libéthâtion est partitchuliéthement spéciale. Au jour d'aniet les gens d'Jèrri ont l'espéthance dé vivre pus longtemps qu'les gens du temps pâssé, et auprès souaixante ans, y'en a du monde acouo en vie aniet tch'ont connu l'Otchupâtion. Duthant les dgiêx ans tchi veinnent y'en a d'parmi ieux tchi lus en vont nos tchitter et jé s'sons acouo pus êlouongni d'lus histouaithes.
J'ai don l'pus grand pliaîsi, au nom d's Êtats d'Jèrri, d'dêdier chu livre à touos les cheins tch'avaient connu la vie souos l's Allemands et tch'avaient offèrt lus contribution à chutte dgèrre-là. Et l'pliaîsi est acouo pus grand viyant qu'châque janne êfant d'l'Île s'en va r'chéver eune copie, coumme un r'cord officiel du souaixantchième annivèrsaithe d'not' Libéthâtion lé 9 d'Mai 2005.
Sénateu Jean Le Maistre
Président du Conmité Libéthâtion 60
Viyiz étout:
