à Portînfé,
Saint Ou.
Moussieu l'Editeu,
Y'a des s'maines quand nou-s-a tant d'sujets quand n'ou veur se mettre à êcrithe que nou n'sait pas iou qu'menchi, mais, malheutheusement, ch'n'est pas d'même agniet. Enfin j'm'en vais faithe d'man mûs, et, comme de couôtume, j'm'en vais qu'menchi par le temps. Eh bein, Moussieu, j'en avons yeu de pûs d'une sorte dépis que j'vos avais êcrit la s'maine passée; y'a yeu du bieau temps et du sale temps, mais i' faut s'attendre à chonna au mais d'janvyi. J'ai un vaîsîn tchi dit que l'préchain mais s'en va être bein pûs fraid. Il a bétôt chent ans et i' se r'souveint des siez s'maines de raide g'lée dans l'hivé de nonante-chinq à nonante-six, quand nou n'pouvait pas touchi à la tèrre et qu'les p'tits ouaîsieaux crévaient d'faim.
Ch'est avec grand r'gret que j'ai entendu d'la mort du Sieur Gilley, le seul survivant d'la famille d'san nom tch'avait pour bein des années gardé les moulîns dans l'ouest de l'Ile. Dans l'Otchupâtion i' n'se fichait pas mal des Allemands, et quand i' 'tait au moulîn d'Gargate, dans la vallée d'Saint Pièrre, i' n'disait jamais nennîn ès gens tchi v'naient dé niet pour un mio d'flieu.
J'ai yeu une vîsite chutte semaine de yun des fils du Député Vautchi, d'la Trin'té. I' m'dit entre autres choses que sa mèthe avait donné naissance à onze êfants, et tch'i' 'taient tous mathiés avec des êfants. Quant à li, i' n'avait pas 'té mathié longtemps, mais y'avait dêjà un p'tit Vautchi, et, sans doute, y'en éthait d'autres. I' d'meuthe ès Pliatons, et est tout à fait heutheux là.
"Si chonna continue," s'fit la Merrienne, quand j'li dis, "i' n'y étha que des Vautchièrs dans l'Ile, mais i' ne f'thont pas d'ma, car ch'est d'bouonnes gens."
"La seule famille à tchi qu'nou peut les compathaître," je m'fis, "ch'est la famille à Ken Richardson, d'la Crouaix ès Mottes, à Saint Sauveux, que nou n'peut qu'admither. Ch'est tant pûs tant mûs, car tandis que y'étha un nombre de vrais Jêrriais dans les fermes, nou n'y vêrra pas tant d'Angliais."
La gâzette nos a dit que les Connêtablyes d'Saint Pièrre et d'Saint Ouën ont 'té d'mandés d'rester en office, et nou peut être seux que nou n'vêrra pas d'changements là. Mais quant à la pâraisse d'Saint Sauveur, nou n'sait pas, car le Tom Mouothant n'a ocquo dit rein d'un bord ou d'l'autre, et y'a une forte rumeur tch'il a idée de r'prendre pour un autre trais ans.
Nou-s-entend par lé radio, que les Russes et l's Améthitchains s'en vont, un mio pûs tard, s'êtablyi sûs la lune. J'avions pâslé d'chonna, la Merrienne et mé, y'a tchique temps, et quant à mé, même si je n'crévais pas d'la fraid, je n'voudrais pas m'trouver à m'n âge, autchun bord ouèsqu'i' n'y avait pas d'femmes et pas une seule auberge. I' s'peut que j'pouôrrais m'pâsser d's auberges, mais quant ès femmes ch'ne s'sait pas la même chose. Il est vrai que j'ai souvent dit tch'ils 'taient une mêprînse d'la part de la Providence, mais chonna n'voulait pas dithe que j'éthais voulu l'Ile dêprivée d'cotillons et tout l'restant. Nennin, Moussieu, autchune personne tchi veur aller à la lune peut y'aller, mais Ph'lip de Portînfé ne s'sa pas du nombre.
À ch'teu', à bétôt, Moussieu, pour une autre semaine.
Ph'lip
Jersey Weekly Post 8/2/1964
Viyiz étout: