Achteu' qu'j'avanche un miot sus l'âge
Et que mes jours qu'menche à filer,
Permettez-mai, je vos engage
Un miot d'ma vie à raconter......
J'ai tout man temps vêchu garçon
Ne m'pressant jamais de marier
Oniêt je peux dire ove buoune raison:-
Vie d'vier garçon - vie d'vier cuochon.

Quand je viais tuous mes omins
Me chitter pour se marier;
Je m'en môchais et je disais
Qu'une vie d'garçon s'rait vie pour mai.
En lus mariant je les créyais
Des bêtes, des fôs perdus d'raison
Ove' des ah! ah! je les laissais
Pour vie d'garçon, - vie d'vier cuochon.

Quand j'étais jeune, - à mes vingt ans
Et qu'j'érhais deu une femme choiesi..
J'mettais chonna à un aut' temps
Pasque jamais j'navais l'oiesi,
Les chances me v'naient et s'en allaient
Sans les r'garder je les laissaient
N'ayant jamais le moindr' soupçon
Qu'une vie d'garçon 'tait vie d'cuochon.

A trent' ans j'avais pus d'raison,
Et à tout prix fallait m'marier.
Avec une fill' de buoun' maison,
Je m'engagis et ou' m'aimait,
Tout allait ben jusqu'à-ce que j'vis
Que des HERPINS y'en avait p'tit,
Alors j'la chitté pour chutte raison;
Pour vie d'garçon - vie d'vier cuochon.

A quarante ans, quand j'vieillissais
Le jour, la niêt - oui, j'y pensais;
Chiquefais j'viais yune chi m'plaisait,
Un autre y v'nait et la prennait,
Et m'laissait d'même, manqu' de hard'hièche
Coumm' t'chien fouttai à la même piaiche,
Pour viv' tréjous en vie d'garçon. -
Oh! vie d'garçon, - vie d'vier cuochon.

A chinquante ans j'étais trop vi
Pour penser à une femme choiesi
J'érhais voulu me contenter,
D'la premiere fill' chi s'présentrait
Mais sans r'garder i'm laissaient tuous
Et pour m'apprendre une buoun' leçon
I s'écappaient et me laissaient
Un vier garçon - un vier cuochon.

Mes soixante ans sont accomplis,
Et mai j'avanche au but d'ma vie
N'ou m'pointe du dai, n'ou m'fait chent coups
N'ou m'comparhe même à les coucous,
Si j'métais prins dans mon jeune temps
Une belle NICE femme pour compagnon
Je n'dirais pas à soixante ans
Vie d'vier garçon - vie d'vier cuochon.

I'mai vai trop vi pour me marier
Quoiqu' je voudrais une femm trouver
Les filles y disent et crient là-d'sus
Qu'à soixante ans n'ou n'y pense pus
De rage, chique fais j'men mors les dais
Quand j'vai la vie que j'ai a-sièthe
Et que tréjous y faut qu'je sais
Un vier garçon - un vier cuochon.

Ainsi garçons - vous chi liesis
Shu p'tit résumé de ma vie
Pensaiz-y tous - prenaiz m'n'avis
Et vos mariaiz pour joui d'la vie
Car, oui! les jours d'un vier garçon
Chi pass' sa vie sans compagnon
Ne sont que minsèrhe après tout.
Oui! vie d'garçon - Oui! vie d'cuochon.