Les Pages Jèrriaises

L'Alphabet d'un Vièr Garçon

 

A Est m'n'Almanâ de la “Nouvelle Chronique,”
Jé n'peux pas m'en passé, j'les garde tous comme èrliques.
 

 
B Ma puorre vieille Baraque de Hutte
Ou'l est comme ou savez justéman au haut des Buttes.
 

 
C Est man vier Chéva gris d'fé
I'nest pas janne achteu, y a vingt-deux ans qué j'lai.
 

 
D Mes Domestiques, qui jamais n'mé font;
Lé pus souvent au bu d'un mais (ou d'vant) i's'en vont.
 

 
E N'est pas m's'Efants, mais les siens d'man vêsin,
Qui vennent dévasté tout chein tchi craît dans man gardin
 

 
F Ma Femme qué j'ai pas oquo trouvé.
J'en cherche pas in'tou car j'é n'veur rein d'itèt.
 

 
G Grounneux chein q'tout l'monde disent que j'sis,
A chu monde là j'vos l'dit i'n'faut pas q'nou s'y fie.
 

 
H Est ma Hache qu'est pendue l'long d'man l'ièt
Ch'est seux, q'jé, s'sait, malheur pour les voleurs la nièt.

 
I Vos montre l'innuothence des siens
Qui disent que jé n'sis bon qu'à poussé de parjeins.
 

 
“Attendez-une minute que j'prenje une pinchie dé sno

Ch'est ichin un Entr'Acte.”


 
J Dit q'mes j'veux quoique gris n'tchaient pon;
La Pommade à Mess Pitchet n'en v'là la raison.
 

 
K J'nai pas rein qui q'menche par K.
Jé n'sis pas l'Khalife, du Klondyke j'né r'veins pas.
 

 
L La vieille Lanterne ov'un verre cratchi,
Qui m'sert dé Lampe, dé Lanterne et d'Changl'yi.
 

 
M Fait vaie la Minsèthe qué j'ai
Man corset d'oeuvre et mes cauches à r'dèrné.
 

 
N Erprésente mes N'veurs et Nièches.
Quand ils arrivent siez mé, n'y'a pas d'malheur qui n'faichent.
 

 
O Est l'seul Ouêsé que j'garde dans la maison:
Ch'n'est ni grive ni alouette, mais un OUÊSÉ A MACHON.
 

 
P A ma Pipé dé P'tun m'fait pensé;
Ou'est qu'y a un vier garçon qui veule s'en passé?
 

 
Q M'rappelle qué man vier Querre à lait
N'sert pas ach'teu car la citerne est à sét.
 

 
R Un Rongeux d'Rat qu'a fait un creux
Par ou'est qui veint goûté chein qu'est dans man drécheux.
 

 
S Saloppes de Suothies qui prennent lus piaisi
A lus nié dans ma crème, a faithe man pain moiêsi.
 

 
T Toutes les Triques qué les vêsins m'jouaient
Si s'trouvait qu'es tchéthues j'tais un mio HORS D'LA VAIE.
 

 
U A certainement s'n'Utilité
Quant à mé l'monde disent qué j'nai rein d'itèt.
 

 
V Mes Valeurs qué j'ai muchi dans...
J'men allais vos dithe yoù, j'mé sis mêfié en temps.
 

 
X Est l'eXactitude
Jamais j'y parveindrai, car ch'nest pas m'n'abitude.
 

 
Y Brigham Young, l'ancien chef des Mormons
Comment jamais qu'il a trouvé du monde pour suivre ses notions.
 

 
Z La dernié lettre de l'alphabet
Vos dit qu'à forche d'Zèle né v'là men travas fait.
 


E.L.I.E.


 

Viyiz étout:

 

Les Pages Jèrriaises