A men avis un vier garçon
N'a pas la valeur d'une freluque;
Il est comme un colimachon
Qui ne sort jamais de sa cruque.

A forche d'être à sen tout seu,
De ses membres i' perd l'usage;
Ses facultés, comme sen coeu,
Vieillissent bein vite avant l'âge.

I' n'possède pour tout r'confort
Que la bouteille ou bein la tablle;
Ch'est de qui tristre que sen sort;
Il est, de vrai, bein minserablle.

Le pus et l'mux il est nerveux,
Et pour un rein le v'la au pllatre;
Et l'hiver le rend si frilleux,
Qu'il en dveint un propre cat d'atre.

I sont hardi particuliers, -
La moindre chose les dêrange,
Et pour pouver pllaire es pouôrs viers
I faudrait quasi être un ange.

I faut qu'ils aient ieu des chagrins,
Ou des affronts dans lus jeane age,
Autrement ils airaient 'tè prins
D'envie de gouoter le mariage.

Comme est que lus temps peut s'passer,
A llière, à chiffrer, à êcrire,
Sans aver corps d'ame à dviser?
Ch'est pus que je ne sairais dire.

Ches pouôrs viers corps me font pitqi,
Car i sont vraiment bein à pllaindre;
I n'sont pas souengnis à maintqi,
Nou dait les ouir bein souvent geindre;

Car ch'est en vain, jamais valet,
Quand i s'agit d'une itell' gamme,
Fût-i de tous le pus au fait,
Ne pouorra rempllaichir la femme.

Si n'ont pon l'esprit vicecasiè,
Quand i pouorraient vivre à lus aise,
De rester touos seurs jours et gnièt,
I faut que je sais un' pouôr' gniaise.

I n'ont que ieux-même à bllâmer;
Comme mé il y-en à pus d'iune,
Qui, s'i voulaient, se fraient un dver
De souslagir lus infortune.

Mon doux, faut-i qu'i saient pervers,
Quand, s'i nouos donnaient la parole,
J'couarrions au scours de ches pouôrs chiers;
Rein que d'y penser j'en affole.

Chu bouan vier garçon, l'juge....
(Mais i ne faut pas que je l'nomme,
Car je crains trop sa marisson),
Airait fait un divers bouan homme.

Aussi bein le juge....
Nou n'en peut faire trop de louange;
Ah! comme je l'airais chéri;
En me i trouverrait un ange.

Quand nouz a de qui bel et bon,
Doux, charmant, gracieux, et tendre,
A la main, et qu'nou n'le prend pon,
Ch'est de qui que je n'peux comprendre.

I semblle qu'ils ont prins serment
D'rester touos seurs, ches viers apotres;
Et pourtant il est êvident
Que nouz est faits l's uns pour les autres.

Vere-dya, j'y-ai longuement réflléchi;
Quand je pense à chein que j'endure,
Je dis que ch'est un vrai péchi,
Ch'est aller contre la nature.

I faut une loué, j'l'ai dit chent fais,
Pour chonna i faut qu'nou s'entende,
Qui condamne touos ches pourpais
Au mariage ou bein à l'amende.

UN ST. LUORENCHAIS.