Depis treis ou quat' jours le mauvais temps m'engnie
Et j'aimerais assez un ptit pus d'compangnie;
J'm'en vais pour me dsengner vouos conter de qui bon,
Qui vaudra dabouan mûx qu'un long, trainant sermon
De bourdonnant ministre ou de failli prêcheux,
Qui semblle exprès fait pour assoupir un dormeux.
Je ne sis pas nè d'hier, j'ai êtudiè une pose,
Je crei que je devrais y connaitre quiq' chose.

Nou trouve dans touos temps, il y-en aira tréjous
De chute tristre race existant parmi nous,
Et qui va et qui veint, et qui r'chai et qui r'donne,
Et qui ne semblle pon être attinse à personne.
Nou crairait à les veîr qu'i n'ont jamais ieu d'mere
Mais qu'il ont ersourdu de quique autre mangnere:
Nou n'sait pon comment s'prendre afin de les clliasser
Dans les mammiferes du grand Mousieu Cuvier:
Nou les nomme innuptae dans les livres d' docteu,
Mais nou les connait mûx et nou l's appele à-ch't-eu
Par lus pus simplle nom de vieill' garce ou vieill' fille:
Ils ont tréjous quiq' ma; ofuche ch'est la bille,
Ou bein des maux de tête ou vents dans l'estoma,
I n'ont jamais de r'pos s'i' ne trainent quiq' ma.
Ofuch' des rhomatiss' ou bein des cors es pids,
Ou si n'y-a pon rein d'autre, un bond de la pépie;
Mais jamais de ma vie, - nan, - jamais je n'ai ouï
Qu'il aient gardè le llièt par aver l'filèt roui;
Et pis il ont l'affront de 'droguir de pus belle
Atou du ratafia ou de ll'iaue de cannelle,
Ou de bouan vin de Port, se prétendant faillies,
Ou bein du thê d'gengivre ou bein de ll'iaue d'anis:
Si par hasard i' gele ou qu'i' quèt de la nèi,
I' lus faut un verre caud, bein fort et bein chucrè:
S'i souffrent d'un ahan dans quicun de lus os,
D'un cotillon d'molton i s'enfllubent bein caud.
La race des vieill' fill' est faite au même moule
En chein qui-a rapport à la langue et à la goule;
Lus chervé n'est pas fait comme le chein d'aut'gens,
I n'y-a pas dans lus tête un ptit grain de bouan sens:
Ch'est d'qui maintqi pêtri, la pâte n'est pas lvèe,
I n'y-a pas ieu d'levton, pas la maintqi assez:
Je crei que le levton de chute tristre vie
Est chein que nouz entend par le mot sympathie:
Ou-est qu'il en pêqueraient', j'vouos dmande, bouannes gens,,
Ov lus perrots et cats et baloques de tchians?

Je sis un vier garçon, i n'y-a pas d'mal à chla;
Ch'est un' bénédiction bein pus que ch'n'est un ma:
Quand nou m'êlourde ocouo de femme et de mariage,
Je rêponds par un cllin, car je sis bein trop sage
Pour m'embâter sott'ment sus la fin de mes jours
De femme ou bein d'aviers; je connais trop lus tours.
Je ne pouorrais jamais quand j'en airais envie
Trouver le moindre rpos le restant de ma vie.
J'aim'rais mux, mafé vere, ètre gardè au llièt
Que de m'aventurer à faire un tel êchet:
Faire un llien qui me fique! I faudrait être bête,
Mais tout vi que je sis j'n'ai pas perdu la tête.
Rôdant à l'entou d'vous afin de vouos guetter,
I' cherchent le moment de pouver vouos happer;
Ch'n'est pas d'agnièt viyous que j'connais les drôlesses,
Ch'est de malines pies, affrontèes, traitresses:
Des qu'i sont esservèes et sus lus ptits pinôts
I cmenchent à s'mirer et arrangir lus frôcs;
La vanitè s'dêcouvre ov lus prumière haleine
Et ne les quittant pus jusqu'à la'mort les mene.

I'ne sairaient durer siez ieux, ch'est trejous cache',
Vla qui lus veint d'nature, i sont trejous en marche
Pour trouver des hommes, ptits, grands, jeanes ou viers;
Mais qu'i portent des braies i lus rgardent dans l's yiers;
I sont plleines de teurs, de malice et d'grimaches;
I vouos font des biaubiaux et vouos montrent lus faches;
Mais les bouans viers garçons n'sont pas aisiment prins,
Lus nèz sont assez longs et i sont assez fins
Pour sentir lus dangir et pour s'en êcapper;
I ne sont pas d's ouaisiaux fort aisis à happer.
I s'mettent à couquir en avanchant en age,
Pour montrer qu'i fraient bein des femmes de mainage;
Ch'est merveilles, podins, bourdelos, et simné,
Crêpes, galette, et gache, assez pour en crever.
Quand i veinnent vieill's fill's i couorent à l'église
Et palent de sermons, de prêtre, ou de sottise,
De missions, de pauvres, et d'associations,
Que nouz en veint à but, à la fin, d'lus chansons.
I creient que ch'est lus d'ver de vouos prendre à brachie,
Et bouan gré ou malgré jusques en paradis,
En croupe vouos porter au d'sus d'chute tristre terre,
Sus lus saint estropiè, mais lus grand chva de guerre,
Et n'veinnent à la fin de touos lus biaux devis
Que quand la mort y passe et i sont ensevelies.

DLLE. NENNÉ CATON.