Nou s'moque des vieill' fill'; la! la! allez, allez!
Il y-en a qui voudraient bein être desmarièz,
Et se r' trouver libres et desenhalodès.
Combein de fais j'ai leu en memême du ji,
D'les veîr haller lus llien, et pis v'nin ov dêpit
Me dire, ous devriez vouos marier Miss Hetty.
Mais j'lus dis l'vier diton, erdit dans touos les temps,
Il y-en a pus d'mariès qu'i' n'y-en a de contents.
Trejous j'ai 'tè contente de n'aver pon fait l'dro,
Car j'ai trejous aimè faire men ptit tripo,
Tout homme i' me pllaisait sans être entou badrèe,
Sans être par personne ou gronnue ou cmandèe.

J'apprécie les hommes, ch'est un' grande cmoditè;
Pour chein qu'i font pour me, je lus en sai bouan grè;
Mais quand une fais un homme est maître à la maison,
Ch'est tréjous cache et cmande sans rime ni raison.
J'n'ai jamais ieu envie de lus donner le drouet
De vnin baillir d'lus goule et ordonner siez me,
Et se mâter dvant l'feu; ah! j'voudrais les y veîr;
Mais i faut l'dire i sont civiles quiquefais.
I' n'y-a nulle âme au monde à qui j'ne frais du bein,
Ils ont drouet sus men coeu s'i' sont dans le besoin;
Si je peux j'les soulage, et si j'en ai l'pouver,
Je fais tout men possible afin d'les consoler.
Je ne sais pas pourqui, sait en souaie ou en cllus,
Je rencontre siez tous mes vaisins la bein-vnue.

Qu'nou se marie s'nou veurt, ch' est à chacun de s'pllaire,
Pour de me je n'vai pas que j'ai rein à y faire;
Je serai bein aise de visiter un brin,
Et de souhaiter jouaie sus d'la gache et du vin.
Hèlas! Hèlas! il y-en a bein assez
Pensant à lus mariage ove une tristre pensèe.
Si la maintqui pouvaient à-ch't-heure aver lus grè,
I' rprendraient bein vite lus chière libertè;
Me j'ai gardè la meine, ieux t'ont fllanquie dehors;
Ah! que j'les vei souvent envier men aisi sort.
Devant qu'i' saient mariès, nou crérait à les veîr
Que l's hommes sont taillis de rigolisse en bouais;
I pllient comme ou voulez, se font tout-à-fait doux,
Contant qu'i ne peuvent en faire assez pour vous;
Mais une fais dans l'aire ont i cllaqui lus botte,
I ne sont pas longtemps devant changir lus note:
Ch'est, où-est qu'tu veins de couorre? y-a deux heures que tu-es horte:
J'ai 'tè au mains vingt fais me mâter à la porte,
Pour veîr si tu rvenais. Donne me men bllanchèt,
Ma cminse de coton, et men rouoge mouochet; -
Mais les tireurs sont ouverts - Bah! qu'est que v'la qui fait;
As-tu bein bllaquinè et fait r'lire mes bottes,
I sembllait que j'avais pilvaqui dans la cotte;
Et le fer de ma bride a-t-i 'tè dêgraissi?
Hâte-te, je t'en prie, car je sis bein pressi;
J'ai perdu une heure de temps. - I m'est avis
Que les hommes d'a-ch'-t-heu sont trejous fort pressis.

D'hommes et d'hommerie j'n'ai qu'faire de m'gêner;
J'peux sortir quand je veux et de même rentrer;
Je prends men pllaisir quand je men trouve l'envie,
Et ne sis pon cmandèe ni gronnue une mie.
Si je sors un ptit d'temps, quand je rveins mes pouôrs bêtes
Ne savent pas que faire pour me faire la fête;
Men pêrrot dit "perrot," et semblle me prier
D'apprechir auprès d'li afin de l' caresser;
I me montre sa tête, se crôle sus ses pids,
Pour m'attrioquir pus et que j'en prenne avis;
Et puss s'en veint couorant, la coue toute erdrechie,
Comme si ch'tait pour li la pus grand jouaie d'la vie;
Des que je sis assise, vite i saute sus me,
Et se met de pus belle à ronner, à ronner;
I s'frotte contre me et bein souvent i tache
De grimper pour pouver même fllatter ma fache.

Ah! ch'n'est pas un homme qui veindrait comme chla,
Vouos rencontrer et faire la fête à votre hus;
Donnez-me men perrot, donnez-me men chier cat,
A garder vos hommes, ous êtes les bein v'nus.

NENÉ CATON.