James Charles Le Touzel fut né à St. Hélyi en 1838. I' s'n allit à la Côte dans ses vîngt ans et n'èrvînt janmais en Jèrri. I' pâssit trais ans ès Bèrmudes, où'est qu'i' rencontrit Ann Catherine Packwood. I' lus mathyîtent et eûtent siêx êfants - quat' fil'yes et deux garçons.
La fanmil'ye d'meuthait à Goderich, Ontario au Cannada, où'est qu' James travaillait coumme marchand d'sé et qu'Harry St. George Le Touzel - iun des deux fis - fut né en 1873.
Pouor mèrtchi la naîssance d'chu nouvieau garçon, James êcrivit un poème tchi fut publié dans la Chronique de Jersey.
Harry d'vînt un înmprînmeux et d'meuthait à New York.
Harry mouothit en 1915 et san péthe pâssit l'pas en 1917. I' fûtent touos les deux entèrrés à Goderich.
I' sembliéthait probabl'ye qué James Le Touzel est l'janne Lé Touzel mentionné par A. Mouothant en 1865.