Les Pages Jèrriaises

Qu'la leunmiéthe sait


Bouan Noué! Nou sait qu'les gens d'l'Âge dé Pièrre tchi bâtîtent les pouquelayes r'connaîssaient l'împortance des solstices - y'en a tchi sont alîngnies pouor la solstice d'Hivé. Nou peut înmaginner l'êffet du solé (s'i' y'en avait) tch'appathaîssait à êcliaithi les pièrres à sinne dé jeu chu jour-là. Ch'est en tchi d'pis les touos vièrs temps les gens ont semblié vouler fêter la lueu au mitan d'l'Hivé quand les nyits sont longues et l'travas dû.

Ch'n'est pon ravissant qu'les Chrêtchiens des preunmié siècl'yes décidîtent dé fêter la naîssance du Saûveux, la Lueu du Monde, en pliein Hivé en même temps qu'la fête Romaine du solé dompteux.

Quand l'Prînce Albèrt întroduîsit la couôteunme dé l'arbre dé Noué, décothé et êcliaithi d'chandelles, en Angliétèrre au dgiêx-neuvième siècl'ye, v'là tchi n's'èrtèrgit pon d'arriver en Jèrri. Pouor les cheins d'Jèrri tchi fêtaient acouo l'Vièr Noué au mais d'Janvyi s'lon l'vièr almonnas, ch'tait sans doute acouo un sîngne du bouôn vièr temps tchi s'en va. Mais coumme tchi qu'i' décothaient lus d'meuthes à Noué en Jèrri à chu temps-là?

Nou soulait graie eune mênagiéthe pouor pendre au d'ssus d'la filyie ou des p'tites mênagiéthes ès pliafonds. Eune mênagiéthe est eune couronne d'ôsyi - au jour d'aniet, s'nou veurt en graie, sans doute nou fait sèrvi du wiyeur ou du fi - auve des buts d'papi en couleurs, des flieurs s'tchies ou artificielles, des ribans et ofûche autcheune aut' chose pouor faithe eune bouonne décothâtion.

Au jour d'aniet, les décothâtions d'Noué ch'est tout du démnîn. Nou peut acater des veues et des mèrlifiches et des flianfliues à seule fîn d'èrtouîndgi ses maîsons. Et y'en a tchi lus craient en compétition d'auve les vaîthîns pouor la d'meuthe la pus êgaluante.

Pouor dé mé j'sis pus à co content auve tchiques chandelles et des londgeurs d'êtînchelle. Mais à ches drein, j'dais l'admettre, j'sis prîns d'un évrédîn pouor ches nouvelles veues à dgiyodes êcliaitheuses èrchèrgeabl'yes atout l'pouvé solaithe. Véthe, achteu la technologie nos donne la pôssibilité d'èrchèrgi nos décothâtions du solé - même du failli solé d'Hivé. Si les Romains r'vénaient, i' n'en r'veindraient pon: j'r'avons la vielle fête du solé dompteux!

Geraint Jennings
 

Viyiz étout:

 

Les Pages Jèrriaises