Les Pages Jèrriaises

Les Lamentations d'une Vieille Fille

J'éthai trente-sièz ans d'main, et j'sis bein au m'zespé,
Qué pas yiun n'est v'nu, pas un seul mé d'mandé;
Et suivant l'zapathances, quoiqué j'fais tout ch'qué j'peux,
Coumme je sis j'restéthai, de pis qu'pas yiun n'en veux.

J'avais pensè pourtant, que le n'veu à Jean L'Gros,
Avait ieu dans l'idèe de m'faithe un propôs;
Mais chest tout fini; y'ia longtemps qu'je n'le veu;
Nou m'fit tchi va vais la grand Charlotte Fillieu.

J'en sis vraiement malade et ne n'sai tchi dev'né;
J'nen dors pas l'long des gnits, car je n'fais qu'y pensé;
Et si l'affaithe continue je n'sai pas tchès qu'en s'sa:
L'Asile s'sa ma r'narde, et j'en finithai là.

Yia moman tchi s'affiyige quant ou vé q'je n'mange pas,
Et tchi m'fait d'itais rouaux quand j'néglyge man travâs,
Ou m'chalbidance la tête et man conte de toute sorte;
Yia des tems, oui vraiement, que j'voudrais bein ête morte.

Aiche tchi faut tchi s'sai dit que la fille à Jean l'Dain,
Qua tout ch'qui faut sièz lyi pour mettre un houmme bein,
Ne trouverra pas, parmi touos l'zhoummes qui yia,
Yiun tchi vaindra lî d'mandai sou cré qui lî f'tha.

Et oul aimthai bein, la bouanne femme, que j'en éthais yiun,
Oul en pâlait l'aut' jour à ma couosine Le Brun,
Tchi lî dis d'avai pâcienche, n'iavait pas d'temps perdu;
Mais yia longtemps qu'oul dit et pas yiun n'est v'nu.

Yia la fille à R'chard Noé tchest mathièe yia deux ans;
Ah! ou'n eu pas tans d'embarras pour trouvé san galant:
J'tînmes ensemblle chu jour là, ch'té en r'venant du vrèt
Tchi lî fit les doux yeaux, et j'fu tout d'suite pathai.

Chest l'annèe tchi vain que toutes les filles ont l'drouet
De proposé ès hoummes, j'en connais tchi l'ont fait,
Et si j'n'en trouve pas d'vans, aussi vrai coumme je l'dit,
Jé proposezé comme yieux, quand j'devthais men r'penti.

si j'en trouve yiun d'man goût, et que j'crai qui m'aimtha,
Il est bein seux et certain qu'je s'sa mé tchi l'étha;
Et si j'avons d'zêfans - comme i' faut bein l'espéthai -
Ma jouée s'sa compliète, tout l'passè j'oubliethai.

J.L.F.
Décembre 1891

 

Viyiz étout:

 

Les Pages Jèrriaises