Le vièr siez-nous s'en va, j'm' y'attendais d'pis longtemps,
J'savais qué l'mauvais jour né manqu'thai pas de v'nin :
Nou travaillait trop p'tit, et nou-s-était trop grands.
Le maître éthait deu l'vaie car, le tchoeu pliein d'chagrin,
J'li'ai montrè des chents fais que l'hèrnais verséthait
S'i' galopait tréjous sans r'garder t'avant li :
J'lî disais l'long du temps coumment qu' ch'la finithait,
I' m'disait d'êtr' mains bête ou bein d'êtr' pus poli!

Poli ! mé, tch'éthais mins pour li ma main au feu,
Mé tch'étais domestique ichin quand i' fut nè,
Tchi l'connaissais au ber, devant tch'il eusse un gh'veu,
Tchi l'ai veu couorre ilo sans cauches et sans bounnèt ;
Mé tchi passais tant d'temps, quand il 'tait p'tit garçon,
A lî faithe des sûfflièts, à rac'moder ses j'vaux,
A li'arrangi san fouet, à lî faithe ses leçons,
Et l'porter à haute dgherre amont côtis et vaux. . . .

Ah, s'il avait comprins l'amiêtchi qu' j'lî portais
Pour l'amour des pouorres vièrs, tch'étaient si bouans pour mé,
S'il avait janmais seu combein qu'j'aimais sa vouaix
Et combein qu'à mes yeux san visage était bé,
S'il avait seu l'amour que j'ai pour tout chonn'chin -
Pour touos les bouais d'la cache et de d'sus les fossés,
Pour châtchun des poummièrs et péthièrs dans l'gardin,
Il éthait bein comprins pourtchi qu'je l'dghernissais!

J'ai mins ma vie entchiéthe à servi ses pathents,
J'ai fait d'man mus pour li, tout vi que j'sis à ch't heu,
Et j'travaillais aucouo, malgré mes septante ans,
Jusqu'au solei' couochant, et dé d'pis sign' de jeu' :
Quand il 'tait tard et tch'i' restait au liet
Attendant, bein couvert, le moment d'dêjeuner,
Ch'tait mé tchi prennais soin de vaie tout l'travas fait,
Malgrè chu roumatisse tchi m'fait tant enhanner.

Quand il 'tait hors en ville, et tch'i' ne r'venait pas,
Ch'tait mé tchi, touos les sièrs, ma lanterne à la main,
Allais m'asseûther qu'tout 'tait bein parmi l'bestchias
Et tchi, d'un p'tit coup d'frouque, arrangeais lus êtrain ;
Jusqu'à minnièt, souvent, auprès d'l'âtre, en haûtant
J'attendais pour le pas d'san vièr cheva gris d'fé....
Ch'tait mé tchi condissais man maitre par-dédans,
Avec le tchoeu bein gros.... et....je m'n allais dêlier....
 

ELIE.