à Portinfé,
Saint Ou.
Moussieu l'Editeu,
La Merrienne et mé, j'avons touos les deux une raide suée d'fraid. Mé, j'ai déjà sali un doûzaine de mouochets d'pis à matîn et la bouonnefemme êternue toutes les chinq minutes. Ch'est l'temps tch'en est la cause, car mêcredi au sé, dans les p'tites heuthes une demie-doûzaine de tuiles fûtent enl'vées en d'sûs d'nos têtes, et dans tchiques minutes, le liet 'tait trempé, et nous étout. J'eûmes à d'valler dans la tchuîsinne, et l'feu n'étant pas tout-à-fait êteint, j'mênagis avec tchiques butchettes et une pal'tée d'tchèrbon, à bouoilli l'ticlye et faithe faithe une tâsse de tais. La Merrienne ayant hallé sa qu'mînsole quand j'avais l'dos touôné, sé couvrit avec ma grand'câsaque, et s'couochi sus l'sofa tandis qu'mé, ayant allumé ma pipe, j'me r'pôsis dans ma grand'tchaise, li versant une fraiche tâsse de tais touos les quarts-d'heuthe. Nou n'pouvait pas dormi à cause de la tempête et quand vînt siez heuthe j'fûmes bein contents de nos l'vé, mais, j'n'avions pas grand appétit pour notre déjeuné, et j'n'avions pas hardi amendé quand vînt l'heuthe du dîné. Quant ès tuiles, sans doute nou pouôrra les rempliéchi quand l'temps molitha. mais au moment j'sommes bein mînséthablyes. Tchèsque éthait jamais creu de vaie d'patheil temps au mais d'Juillet!
Sans doute, Moussieu, ou voudrez saver si la Merrienne a attrapé les trais lapîns qu'oulle avait voulu renvier à san fils après tch'ils avaient 'té à bânon dans l'gardîn. Eh bein, nennin, les fichus lapîns sont ocquo dans l'fond d'lûs creux dans l'bas du gardîn et n'déshallent pas sinon quand i' fait niet. Le Bram avait envié le deuxième de ses garçons qui va tither au blianc, avec s'n arme mais l'mousse fut renvié ben vite car, n'viyant pas d'lapîns, i' tithit yunne des poules à la Merrienne tchi s'était êcappée du poulaillyi, et malheutheusement ch'tait la seule tch'avait produit un oeu dans les derniés siez s'maines.
Après tout, Moussieu, le nouvieau Chantgni à Saint Louothains se nomme Emmanuel et non pas Le Cornu. J'en avais fait la r'mèrque à la Merrienne, quand j'la vis souosrithe, et j'li d'mandis tchèsqu'i' l'amûsait.
"Ch'est chein que l'Connêtablye dit quand l'Sieur Emmanuel se trouvit là comme le seul candidat," ou raiponnit. “John Baudains considéthe que tu dév'thais aver la tête examinée pour aver suggethé que y'éthait d'l'opposition. Il est vrai tch'i' n'té nommit pas, mais nou comprint tout-d'suite que ch'tait té”.
"Vèthe," je m'fis, “et chonna m'a bein êtonné, mais ch'n'est pas fini, car yun d'chais jours j'ai dans l'idée que l'John Baudains et mé j'ithons touos les deux, bras d'sus bras d'sous, consulter un docteu, et au mains j'séthons ouèsque j'en sommes.”
“Lé docteu n'ditha jamais qu'un Connêtablye comme lé John Baudains a la tête cratchie,” ou dit. “Quand à té, j'admets que j'ai ieu mes doutes tchiquefais, mais enfîn nou vêrra.”
“J'te r'mercie pour lé complyiment” j'li dis, “mais j'peux attendre, mais chein que j'voudrais dithe au Connêtablye ch'est que si un certain Le Cornu n'avait pas 'té si embarrassé i' n'éthait pas pâslé de tête cratchie. À ch'teu Merrienne, dans les trais Chantgniers y'a un Jèrriais, un Angliais et un fis d'Français, une chose que nou n'avait jamais veu d'vant. Le Sieur Louothains est connu, lé moussieu angliais est bein populaithe, et l'Jack Emmanuel a ocquo à donné ses preuves, comme nou dit en France, mais il a fait un bouon Vîngtgni et un bouon Officyi d'Connêtablye, I' faut souhaiter bouonne chance à touos les trais.”
“Et au Connêtablye étout” ou dit. "I' n'faut pas oublier lé John Baudains."
"I' n'y a autchun dangi que j'oublie un homme tchi m'a dit que j'ai la tête cratchie," j'li dis. "Mais, Merrienne, j'crais qu'à ces sé nou dév'thait bèthe à la santé du Baron Coutanche dé Saint Brélade."
"Dé tout man tchoeu," ou s'fit, et à ma grande surprînse, Moussieu, ou dêshallit de l'armouaithe une boutelle et j'eûmes châtchun un vêrre caud, li souhaitant en même temps bouonne santé pour bein d's années.
"Ch'est assez drôle, Merrienne," j'li dis, ayant 'té r'fûsé quand j'avais d'mander pour un autre p'tit vêrre pour bèthe à la santé d'la famille Coutanche, "que quand les vielles familles dispathaient il en veint d'autres pour les rempliéchi. Les d'Auvergnes, les Dumaresqs, les Le Chers, les Collas, i' sont horts, mais à ch'teu y'a les Coutanches et sans autchune doute ils éthont des successeurs. Ch'est comme chonna partout. Quand la Providence veint à vaie tch'il est temps qu'une famille dispathaitre oulle a tréjous tchiquechose à prendre sa plieche."
"Y'en a pourtant tch'i' continuent longtemps," ou dit. "J'pouôrrais t'en nommer deus-trais, mais j'sais bein que ch'n'est pas la peine."
"Nan," j'm'accordis, "mais n'oublie pas que ch'est parsqu'ils ont tréjous suivi l'exemplye d'Abraham et de Salômon. ch'est là l'seul plian, et té et mé j'avons fait d'notre mûs étout. Nou n'peut pas dithe qu'à les prendre yun dans l'autre, nos mousses n'ont pas touôné bein. À ch'teu, y'a tchiquechose d'autre dans la 'Post' tchi t'a fait souosrithe: tchèsque ch'est chutte fais?"
"Ch'est l'portrait du John A'court avec lé Gouverneux et l'Maréchal," ou dit. "Lé seul qu'a san chapé sûs sa tête et sa main dans sa pouchette, et tchi n'pathaît pas un mio dêrangi, ch'est l'John. À l'vaie nou dithait tch'il est accouôtumé à rencontrer des gens d'chutte qualité-là touos les jours."
"Mais," j'li d'mandis, "l'as-tu jamais veu autrement?"
"Nennin," ou dit, "mais nou m'a dit que l'jour tch'i' trouvit san superbe boeu mort dans l'clios, i' restit bein trantchille pour tchiques minutes. Il avait une grande affection pour chu boeu-là. Tu as veu, Ph'lip, que l'Maréchal examinait d'bein près lé jeune boeu que l'John dêshallit.”
“Vèthe,” j'li dis, “et accordant à la gâzette, i' comprenait le dos, les gambes et la tête du boeu, mais, avec toute s'n êducation, i' n'comprenait pas l'breûchet, et voulit saver pourtchi que l'boeu avait ditet. Sans doute i' fut satisfait de chein que l'John li dit. Mais, après tout, i' n'fit pas la mêprinse tch'avait 'té faite y'a bein d's années à ch'teu par un certain Connêtablye d'Saint Sauveux.”
“Tchi mêprinse?” ou d'mandit.
“Eh bein, Merrienne, je n'crais pas que j'dév'thais t'raconter chonna,” j'li dis, “car tu m'dithas que ch'est tchiquechose que j'ai inventé, mais j't'asseuthe que ch'est la puthe véthité. Lé Connêtablye dans chu temps-là était Moussieu Ereaut, un nomme hardi respecté, mais pas trop brilliant. Un bouon jour i' fut visiter une ferme dans sa pâraisse, et dans un clios y'avait une rangie d'bêtes à la têrrée. Arrivant à yunne, et n'voulant pas admettre tch'i' n'savait pas la difféthence entre une vaque et une biche, i' r'mertchit qué chutte vaque-là avait un raide bieau piéchot.”
La Merrienne d'mandit si l's autres avaient dit la même chose. “Nennîn,” j'li dis, “car ch'tait un boeu!”
Ph'lip.
1961
Viyiz étout: