À Portinfé
Saint Ou
Moussieu l'Editeu,
"Mais, man pouôre Ph'lip, tchi tempête!" s'fit la Merrienne hier au sé. "Je n'me r'souveins pas d'aver jamais veu pièthe. I' semblye que tout s'en va cratchi".
"Vèthe," j'li dis, "ch'est comme tu dis, une vraie tempête, mais j'avons veu pièthe, Merrienne. J'me r'souveins d'un matin, y'a bein d's années dans l'mais d'août, quand ichin à Saint Ou, comme dans d'autres parties d'l'Ile, y'avait des chents grands bouais à travers les routes. Pour aller en Ville dans chu temps-là il fallait prendre la route de haut, car l'Avenue Victoria n'avait pas ocquo 'té bâtie et d'la Preunmié Tour jusqu'au Weighbridge, i' fallait traverser un bouon pid d'ieau et être seux d'être trempés jusqu'à la pé. Tu vé, Merrienne, pour un vraie tempête i' faut une bein haute mathée et une solide brise de vent de l'ouest ou du sud-ouest. Quand, comme chutte fais, i' veinnent ensemblye, nou-s-est seux d'une raide tempête, tchi qu'menche une bouonne heuthe d'vant mathée haute, et tchi peut r'venin deux fais par jour, ch'est à dithe au matin et au sé pour tchique temps. Mais j'n'éthais pas creu de vaie chonna au mais d'janvyi."
"J'ai même ouï," ou s'fit, "que hier matin la mé fut poussée jusqu'a la P'tite Cour, de tchi qu'nou craignait que l'juge Vouaisin perdrait sa vie".
"Ch'tait du gniolin," j'li dis, "car lé Juge n'était en autchun dangi, et quand-même, comme un bouon cap'taine, i' savait que ch'tait san d'vé d'rester sûs l'pont du baté. Ch'est chein qu'nou-s-a tréjous ouï qu'un cap'taine dait faithe quand san baté a capuchi contre un rotchi, et tchi n'y a autchune espéthance d'être sauvés".
"Heutheusement lé pièthe est pâssé," ou s'fit, "ou au mains les hautes mathées ne r'veindront pas pour tchique temps. Mais, Ph'lip, ch'est tout bein bouon d'pâsler du Juge Vouaisin, mais la personne que j'pliains ch'est la pouôre Bella tch'a perdu des couvertuthes, des lincheurs, des ouôthilliers et, pour agver tout, deux pathes dé cauches en souaie qu'ou v'nait d'accater et d'autres choses que j'n'ai pas besoin d'mentionner. Tout, ou prèsque tout, est hors au vent, et ou n'a autchune idée iou r'garder pour. Tu t'r'souveindras p't'être que j'avais yeu la même malfortune y'a tchiques années, quand la seule chose tchi m'restit ch'tait un cotillon et un corset, tchi s'étaient jutchis sûs une êpine, et un autre articlye que tout l'monde pouvait vaie attrapé dans les branques d'un orme tch'avait bétôt chent pids d'haut. Tout l'vaisiné vint l'vaie pour sé fichi d'mé et jamais je n'avais yeu si grande honte. J'éthais creu que la Bella n'éthait pas oublié ch't'histouaithe-là, et en éthait profité, mais nennin, oulle a tréjous yeu la tête un mio cratchie, et à ch'teu oulle est trop vielle pour changi."
"Chonna n'me gêne pas" j'li dis, "car oulle est femme mathiée, et s'ou n'a pas assez d'avis à ch'teu, jamais ou n'en étha. Mais chein tchi m'gêne, Merrienne, ch'est d'entendre que dans p'tit d'temps les téléphones s'en vont étre automatiques. J'en ai pâslé à un membre d's Etats, tchi dait saver tchèsqu'i' dit, et i' m'asseuthe que ch'n'est qu'un qu'mench'ment."
"P't'être bein," ou s'fit, "mais dans l'entretemps tchèsqu'i' s'en va dév'nin des chents femmes et filles tchi sont employées à ch'teu ès téléphones?"
"Quant à chonna," j'li dis, "sans doute i' trouv'thont du travas comme fonctionnaithes des Etats, car lé Sieur Venables n'a jamais assez d'employés."
"Mais," ou dit, "j'criyais que y'avait yeu des pliaintes dans l's Etats que y'avait déjà trop d'employés payis par l'Ile."
"Bein seux que y'en a déjà trop," j'li dis, "mais lé Député Venables n'y fait autchune attention, et continue comme dé couotume. Nou-s-entend, et je crais que ch'est vrai, tch'il a idée de s'mettre candidat pour Sénateur d'vant long ou, ch'est à dithe, quand y'étha une vacance. Partout, nou ouait que l'Peter Crill s'en va être lé préchain Avocat-Général, et si ch'est d'même, nou pouôrrait vaie une êlection pour Sénateur dans toutes les pâraisses, car je n'doute pas que y'étha d'l'oppôsition au Député Venables. Hardi dépend de l'homme tchi s'met contre li."
La Merrienne dit qu'oulle avait tréjous comprint que l'Sieur Venables n'éthait pas grand vouaix dans la Campagne. "Sans la Campagne i' n'pouôrrait pas y v'nin," oulle ajouôtit.
"Nou n'peut pas s'en faithe seux," j'li dis. "Dans la dernièthe êlection pour Sénateur, un mais d'vant l'jour nou n'éthait pas donné quatre souos pour la chance du Député Farley, mais il y vint facilement quand-même parsqu'i' sut comment s'prendre. Pour réussi d'nos jours, i' faut qu'un candidat deshalle et s'fait connaitre és êlecteurs. Lé Sieur Hettich n'voulit pas prendre la peine, et par conséquence perdit san seige dans l's Etats. Après tout, un êlecteur conte tch'il a l'drouait d'aver un mot avec un candidat d'vant voter pour il. Même dans ta favorite pâraisse, si l'Chantgni Louothains n'avait pas print l'avis d'ses amins et n's'était pas mint en travas sûs la fin, il éthait tchais de d'sous. Mais, Merrienne, j'avais dit que j'tais gêné par le système automatique que j'allons aver pour les téléphones. Si ch'tait tout, nou pouôrrait être embêtés, mais ch'ne s'sait rein. Malheutheusement, si chein qu'chu membre des Etats m'a dit est véthitablye, et que ch'n'est qu'un qu'menchment, y'a des choses bein tristes tchi s'en vont arrivé ichin en Jèrri".
"Mais, man pouôre Ph'lip, tu m'fais peux," ou dit.
"Tu'éthas pûs d'peux d'vant que j'aie fini, ma vielle," j'li dis. "I' pathait que bétôt les scientistes éthont l'pouvé d'dirigi l's affaithes des gens par des procès automatiques. Par exemplye, une femme n'étha pas besoin d'un homme pour produithe un mousse, ou même une douzaine dé mousses s'oulle en veur autant, et une vacque produitha un viaud sans l'aide d'un boeu. I' n'y étha pûs d'Etats, car les louaix s'sont produites par le procès automatique. Après un temps, les hommes tchi restéthont, et tout l'restant du sexe masculin, dispathaitront compliétement, car s'i' n'crévent pas d'yeux-mêmes, les scientistes séthont tchi en faithe. Je t'avais dit que j'avais tchiquechose de bein triste t'raconter: tchèsque tu'en crais à ch'teu?"
"Chein que j'en crais," ou dit, "ch'est que chu membre d's Etats tchi t'a raconté chais mensonges-là f'thait mûs de n'se présenter pas dans notre bel ou dans ma tchuisine, car autrement i' s'trouv'tha en grand dangi d'aver la tête câssée. Allons, Ph'lip, oublions tout chu gniolin-là et mangeons un mio d'soupé et même p't'être un p'tit lermin pour nos rêcauffer."
Ph'lip
La Gâzette du Sé 13/1/1962
Viyiz étout: