Moussieu l'Rédacteu,
J'tais à vouos pâler d'un d'luge dans ma lettre dé la s'maine pâssée, mais j'n'avais pon d'idée, dans chu temps-là, qué chutte plyie éthait l'rêsultat dé m'faithe prisonnyi sus la montangne. I' n'y'avait pon d'dangi qué l'ieau montîsse jusqu'à la maîson d'mes anmîns tch'est sus la hauteu, mais là où'est tch'i' y'a d'la hauteu y'a d'la baîsse étout, en forme d'vallée, et ch'est là qu'la plyie d'vale ava la montangne et s'atchumule et forme lé canné et la riviéthe.
Touos les cheins tchi d'meuthent dans les montangnes ont à pâsser par dessus ches cannieaux et riviéthes pour aller faithe lus boutiqu'sies en ville à tchique milles dé lus d'meuthes, et né v'la où'est qu'nou s'trouve en embarras.
Comme i' s'adonne, y'a eune assez belle route tchi mène du domicile dé m's anmîns, sus l'bord d'eune montangne, à chîn milles dé la ville dé Fallbrook. A bein près à maintchi c'mîn d'la route y'a un pâssage tch'est au nivé du fond d'la vallée où'est qu'deux ruissieaux sé rencontrent.
Chutte rencontre sé trouve un mio en d'ssous du nivé du c'mîn tch'est chimenté comme lé restant d'la route, et l's ieaux des russieaux sont à peine visibl'yes parmi la bouaîs'sie et les brousses ès alentours en temps ordinnaithe, mais la grande quantité d'plyie d'à ches drein a changi les russieaux en riviéthes et les riviéthes en mathes où'est tch'il' ont ieu l'run d's'atchumuler, et né v'la chein tchi s'est arrivé à chu passage-là. Pon mouoyen d'pâsser. La mathe est à tchiques pids en d'ssus du c'mîn. L'ieau est couleuthée jaune par la tèrre qu'ou dêgrade du côté des montangnes, et nou n'vait rein du c'mîn en d'ssous.
Ché s'sait dangereux d'êprouver à patouoilli l'travèrs, et dangereux en autcheun cas à cause du couothant tchi s'est dêveloppé par la rencontre des deux russieaux gonfliés en riviéthes.
Il a don 'té împossibl'ye d'aller en ville boutitchi et acater l'mangi. Heutheusement, j'n'avons pon enhanné d'faim ouaithe tch'i' y'a eune douzaine dé jours qué j'sommes prisonnièrs dans les montangnes. Mes anmîns, lé Sieur Triggs et sa danme, née Carré en Jèrri, gardent eune bouanne quantité d'vivres dans lus "freezer" et il' ont un mangnifique gardîn tchi souangne du fournissement d'lédgeunmes. Et pis y'a tout pliein d'fruits et d'oranges et d'panplémousses, et sans doute i' n'manque pon dg'ieau potabl'ye, et j'avons vêtchu comme des Rouais.
Eune chose que nou-s-oublyie, dgia, est qué les fortes achies d'plyie amènent d'aut' avâries. Par exempl'ye, les cannieaux, russieaux et riviéthes enfliés par lé d'luge dêbordent et abattent tout en formant un couothant irrésistibl'ye tchi dêraichinne les vièrs bouais et aut' objets en pâssant. Iun d'ches vièrs bouais s'abattit duthant l's achies et copit l'fi êlectrique en tchiyant contre, et nouos v'la sans êlectricité, et conséquemment sans veue! Nouos v'la don à la veue d'la chandelle comme quand j'tais mousse y'a huiptante ans, et v'la tchi m'a fascinné dé r'vaie tout à la lueu d'la chandelle tchi donne un air dé mystéthe partout.
V'la tchi m'ramémouaithe les heuthes qué j'ai pâssé à liéthe à chutte lueu quand j'tais mousse - quand jé c'menchis à aller à l'êcole siez "Miss" Maugi auprès l'Eglyise dé St. George à l'âge dé sept ans, et qu'j'apprîns à liéthe. J'liêsais autcheune êcrituthe qué j'pouvais mett' la main d'ssus - livres (et i' n'y'en avait pon fort par les c'mîns, d'livres!), mios d'gâzettes, autcheune chose tch'avait d'l'înmprînmethie d'ssus, et jé l'faîsais souvent à la lueu d'la chandelle dans ma p'tite chambre en d'ssus d'la montée siez Papa à La Forge. Quand ch'tait un livre qué j'liésais, jé v'nais si întérêssi d'dans qué j'y pâssais la maintchi d'la niet. Ch'n'est don pon ravissant tch'i' y'a d's années qué j'mets des leunettes. Et jé c'menche à m'apèrchéver qu'ma veue est lâssée. J'm'en sis sustout apèrchu en brâsilyant l'îndex des bulletîns d'L'Assembliée d'Jèrriais qué j'ai prîns avantage dé faithe en étant prisonnyi d'la montangne ichîn ches jours.
Eh bein, j'avons ieu trais ou quat' jours dé bieau temps et d'solé dreinement. I' pathaît qu'j'allons pouver r'faithe quémîn pour la ville iun d'ches jours.
Lé manque d'êlectricité m'fait penser à la nécessité mondiale d'en couoyer l'ûsage dépis tch'i' faut tant d'huile et d'tchèrbon pour en faithe. Av'-ous janmais r'fliéchi combein qu'nou-s-en fait sèrvi, d'êlectricité, à londgieu d'jours? Ch'est quand nou-s-en est privés qué nou s'en d'mente!
George d'la Forge
13/4/1978
Viyiz étout: