Les Pages Jèrriaises

La pêque quand j'tais janne



Ieune des choses qué j'aimais l'mus faithe pendant les longues journées d'êté ch'tait d'aller, toute la fanmil'ye, à la pêque quand la mathée 'tait basse, pour chèrchi les paîssons ou des vliques. Il a pâssé gentiment dg'ieau l'tou d'la Corbiéthe dépis ches jours-là!

Par exempl'ye quand lé maqu'sé arrivait au mais dé Juilet, les louêmes tout avaû lé rivage soulaient brilyi auve des milles p'tits bliancs paîssons, la v'nîse tchi fait un bouon r'pas pouor les p'tits maqu'sieaux et pouor nous étout. Mais tristément i' sont bein rares au jour d'aniet.

Ou pouvêtes chèrchi les grôsses chèrvettes qu'nou peut trouver dans les pits dg'ieau au sud de l'île lus situâtions 'taient tréjous un s'gret bein gardé ou les coques ou des lanchons tchi vivent sus les bancs d'sablion près des caûchies d'Gouôrray ou d'St. Aubîn. En pâssant, combein d'gens connaîssent qué l'nom d'la Baie dé Pliémont est “La Grève au Lanchon”?

Parmi l's autres paîssons y'avait les manchots et les nièrs vlicots mais à ch't heu i' sont difficiles à trouver. Si nou 'tait chanceux nou pouvait prendre pôssibliément dé temps en temps eune crabe ou un honmard laîssi ès êcouettes à bas dg'ieau parmi les rotchièrs.

Il 'tait bein împortant d'prendre les propres gréements dé pêque. Pouor les grôsses chèrvettes et la v'nîse ous avêtes bésoin d'eune forte have, un râté pouor les lanchons et les coques et du sé pouor attraper les manchots.

Et pis quand lé temps et les mathées 'taient favorabl'yes, ch'tait l'temps d'aller à la grève. Auprès eune bouonne journée il 'tait bein agriabl'ye d'rentrer à la maîson auve eune bouonne pêque et d'aver un raide bouôn festîn.

John Denize


 

Viyiz étout:

 

Les Pages Jèrriaises