Les Pages Jèrriaises

Quand J'tais Mousse

 

D'vant l'Otchupâtion, quand i' n'y'avait pon d'êcole, j'attendais tréjous fête pour aller auve man péthe à la vaûle du mulet sus les "steps” d'la vielle cauchie à la Grève dé Lé; chutte partie-là d'la cauchie n'existe pus.

Pour attither l'mulet, les pêtcheux env'yaient du chèrvîn à l'ieau, et tchique temps après i' c'menchaient à mordre, et les sept u huit enthousiastes 'taient contents quand i' n'en prannaient deux'trais.

Enfîn y'avait eune exception, car quand l'Sieur Fraînque Clezio 'tait là, i' tait seux d'en attrapper lé doubl'ye d'autchun aut', et san ségret n'fut janmais dêcouvert.

J'dév'thais explyitchi qué l'chèrvîn 'tait un mêlange dé hardi p'tites chèrvettes et d'aut's sortes de touos p'tits paîssons prépathé d'avanche, mais tchi odeu!

Pour tchiques années d'vant l'Otchupâtion à la fîn d'la dêfouithie d'patates, i' v'nait des masses de blianchailles à Ste Cath'rinne justément d'vant la mathée haute du sé; i' taient suivies par dé grandes meules dé cârré, mais bein p'tit dé vrai maqu'sé; la mé v'nait comme dé l'ieau bouoillie.

S'attendant d'eune bouonne pêque, man péthe mettait les bancs d'pique-nique sus san "lorry" et accompangni d'anmîns et d'vaîsîns, i' cachait d'St. Ouën vèrs Ste. Cath'rinne ioù qué j'tions garantis d'attrapper pus d'paîsson qué j'pouvions mangi.

A chu temps-là, lé Sieur Gordon J'valyi (pus tard Chent'nyi), d'meuthait ès Geonnais et étant emporté pour la pêque, i' faîthait hardi comme man péthe, mais sa destinnâtion 'tait difféthente car il allait à Gouôrray ioù qu'nou prannait d'bouonnes pêques dé vrai maqu'sé mais bein p'tit d' cârré. Ch'la m'acc'modait bein, car quand man péthe n'allait pon à Ste. Cath'rinne j'allais auve lé parti des Geonnais.

Ioù qu'ches bouôns temps-là sont hors?

 

Percy l'Masuthi

 

Viyiz étout:

 

Les Pages Jèrriaises