“Né v'là un six!” qué j'criyis en tapant la balle dans la bordeuse dé gérémiennes à Papa.
“Nou-fait,” dit Papa, tchi 'tait pitcheux et juge pouor not' pétite gamme dé cricket dans l'gardîn. “Ch'tait la gambe dévant l'vitchet! Tu'es hors pouor un cannard!”
“Oh Papa!”
“En tout cas,” ajouôtit Papa, “chutte bordeuse-là est man silly mid off, et tu'as 'té happé. Et j'ai trop caud dans l'solé à pitchi des balles pouor achteu - i' m'faut eune vèrrée d'limonnade, man p'tit.”
“OK Papa,” qué j'dis, et j'halis lé vitchet (tchi 'tait deux boutelles dé limonnade auve eune brantchette sus).
Papa ouvrit ieune des boutelles et vèrsit deux vèrrées d'limonnade.
“Ah,” i' dit auve un soupi, “j'sis trop vyi pouor des gammes dé cricket achteu. Mais quand j'tais janne, y'avait des gammes dé cricket tout l'temps en Êté. Nou jouait dans les Pâraîsses, et autchun bord où'est qu'i' y'avait un bêtchet d'tèrrain nou-s'arrangit des gammes auprès l'travas. Ch'tait d'tchi bouan d'vaie les membres d's Êtats tchi halaient lus câsaques auprès eune matinnée dé d'bats dans la Chambre à seule fîn dé jouer eune bouanne gamme dé cricket.”
“Où'est qu'i' jouaient la gamme, Papa?”
“Bein seu qu'dans l'Vièr Marchi,” rêponnit Papa. “I' fîtent sèrvi la Pyramide coumme vitchet, et l'Bailli, dans ses robes, avaient tréjous l'honneu dé pitchi l'preunmyi.”
“Mais pouortchi qu'i' n'jouent pon dans l'Vièr Marchi au jour d'aniet?”
“Mais les Membres des Êtats qu'j'avons achteu sont un fliotchet d'reintchivâles tch'aiment mus aller sus des junkets dans d'aut's pays ès dêpens des contribuabl'yes qué jouer des gammes dé cricket. Y'en a tant tchi sont à Londres, ou à St. Lô, ou ès Caraïbes, ou dans tchique jungl'ye Afritchaine ou tchique bord, à mangi des dinnièrs et dormi dans des hôtels à chîntch'êtailes et distchutter les finnances auve des bantchièrs, qu'la mâjorité du temps, i' n'y'a pon assez d'membres pouor faithe deux êtchipes. Il a pâssé gentiment dg'ieau par la Corbiéthe d'pis les bouans vièrs temps quand Lillie Langtry 'tait la pus fanmeuse joueuse dé cricket en Jèrri.”
“Lillie Langtry jouait au cricket?” qué j'excliâmis. “J'n'avais janmais ouï d'ité!”
“Ma Manman avait joué contre lyi dans eune gamme dé pâraîsse à St. Saûveux,” dit Papa. “Bein seu, chenna 'tait avant qu'ou d'vînsse fanmeuse et qu'ou rencontrîsse lé Prînce dé Galles.”
“Coumme tchi qu'ou rencontrit l'Prînce dé Galles, Papa?”
“Bein, né v'chîn l'histouaithe qué ma Manman m'racontit y'a bein d's années. I' pathaît qué quand la janne Lillie tchittit l'Île pouor aller à Londres sus l'stînme, touos les joueurs dé cricket 'taient là sus la cauchie à la saluer auve lus battes – et bein seu qu'quand oulle arrivit à Porchémue, y'avait un troupé d'cricketeurs Angliais à sa rencontre (pa'ce qu'oulle avait dêjà la réputâtion d'êt' la pus belle joueuse dans l'Empire Britannique entchi). Et coumme dé raîson, quand oulle arrivit à Londres ou fut învitée d'jouer à Lords – lé grand tèrrain d'cricket – et ch'fut là qu'lé Prînce dé Galles, assis à s'n aise dans la Boête Rouoyale auve eune vèrrée d'champangne, vit la belle Jèrriaise sportive pouor la preunmié fais. Bétôt, ou d'vînt eune vîsiteuse dé couôteunme ès gardîns du Palais d'Buckingham – et nou dit qu'les gens soulaient rencontrer l'Prînce et la Lillie, touos les deux rouogis et êssoûffliés, driéthe les bouais et les bordeuses des gardîns.”
“Pouortchi qu'i' 'taient êssoûffliés, Papa?”
“Eeeeehhh, bein man fistaud,” explyitchit Papa, “Ch'est pa'ce qu'i' taient à pratitchi l'cricket sus la bliête – la batt'tie et la piqu'thie, et sustout la happ'thie... à chein qu'ma Manman m'dit, y'avait un tas d'happ'thie entre ches deux cricketeurs distîndgis. Mais la m'mèe au Prînce, la Reine Victoria, n'aimait pon trop toute chutte jouêthie ensembl'ye sus la bliête du Palais, sustout quand ou dêcouvrit qu'il' avaient fait sèrvi des changlièrs en or dé d'dansl'Palais coumme lus vitchet: 'Jé n'sommes pon amûthées!' qu'ou dit. Et don les joueurs – lé Prînce et sa parchonniéthe - lus en allaient à Lords à seule fîn d'jouer dans d's êtchipes dé cricket en s'gret.”
“Coumme tchi qu'i' jouaient en s'gret dans un té stadium, Papa?” jé d'mandis.
“Bein seu qu'en dêdgîthement à seule fîn qu'la Reine n'en ouîsse mot,” rêponnit Papa. “Lé Prînce m'ttait eune castchette auve eune manniéthe dé gril d'vant sa fache à seule fîn qu'nou n'l'èrconnaîsse pon. Et, man p'tit, né v'chîn pouortchi qu'les batteurs d'au jour d'aniet portent ches castchettes-là en mémouaithe du temps quand l'Prînce dé Galles jouait à Lords.”
“Mais coumme tchi qu'la Lillie s'dêdgîthait, Papa?”
“À seule fîn qu'les spectateurs ne viyîssent pon sa belle bouoche et san rouoge à lèvres, ou cliuttait eune ênorme fausse moustache sus sa fache. Et d'chutte manniéthe-là ou r'chut san fanmeux mênom.”
“Tchi mênom, Papa?”
“Viyant qu'auve chutte grande moustache-là ou r'sembliait divèrsément au grand joueux Australien, Dennis Lillee, ou 'tait mênommée 'The Jersey Lillee'!”
Et Papa adèrchit l'aut' boutelle dé limonnade auve la balle. “Koumékéch'na?! Howzat?!” qu'i' criyit.
Papa est tréjous à m'pitchi un googly quand i'm'raconte eune histouaithe, car il est un fichu vièr menteux.
Geraint Jennings
2003
Viyiz étout: