Lé solé lithait sus la mé et l'sablion 'tait caud et blianc. Les palmes sus la prom'nade décoraient la scène, et nos v'là, Papa et mé, à la Baie d'St. Brélade à chèrchi d'tchi sus la grève pouor man projet à l'êcole.
“Ch'est en tchi,” j'dis à Papa, “j'm'en vais cliuter du sablion et des p'tits galets sus du carton pouor faithe un portrait d'la vie duthant l'Âge dé Pièrre en Jèrri.”
“Et tch'est qu'tu'as apprîns entouor La Cotte dé St. Brélade, man p'tit?”
“L's hoummes et les femmes des caves soulaient d'meuther là-haut sus la falaise,” et j'pointis par lé mauvais bord.
“Nou-fait,” dit Papa auve un souôri, “oulle est là, à l'aut' bord d'la baie. Vai-tu ches rotchièrs-là? La v'là. Et les hoummes des caves soulaient chasser l's êléphants laineurs amont l'mont et pis les bêtes tchiyaient à lus mort dé d'ssus la falaise.”
“Coumme tchi qu'i' chassaient ches êléphants, Papa? I' 'taient ênormes, ches bêtes-là, auve des longues d'fenses. Pouortchi qu'les êléphants, ieux, n'chassaient pon les hoummes des caves?”
“Bein, man fistaud, j'm'en vais t'raconter coumme tchi qu'ou 'tait, la vie duthant l'Âge dé Pièrre en Jèrri.” Papa s'assiévit sus un rotchi et dessinnit la silhouette d'un êléphant laineux dans l'sablion. “L's hoummes des caves soulaient chasser l's êléphants laineurs, et les rhinocéros laineurs étout, et les hippopotames laineurs, et les girafes laineuses. Et viyant touos ches annimaux laineurs, un jour i' lus vînt à l'idée dé lus couvri d'laine d'êléphant à seule fîn dé lus garder bein cauds, et don i' c'menchîtent d'ouvrer des corsets d'oeuvre. Mais les St. Ouonnais prîntent du temps à arriver enfîn ichîn à St. Brélade - i' n'y'avait pon d'bouôns c'mîns entre les pâraîsses à chu temps-là - et don i' n'restait qu'les pus vièrs êléphants laineurs. Né v'là pouortchi qu'i' sont des Gris Ventres, pa'ce qu'il' ouvrîtent lus corsets d'oeuvres d'la laine dé gris êléphants.”
“Oh Papa! I' portaient des pieaux!”
“Ch'est bein vrai. Ch'est en tchi l'expéthiment auve les corsets d'oeuvre né marchait pon trop bein. Touos lus ôtis 'taient en pièrre dé feu. Lus coutchieaux 'taient en pièrre dé feu, lus haches 'taient en pièrre dé feu, lus tchulièrs 'taient en pièrre dé feu, et même lus sâsse-paines 'taient en pièrre dé feu.”
“Des sâsse-paines en pièrre dé feu, Papa?”
“Bein seu! Il' alleunmaient lus feurs en tapant ensembl'ye deux sâsse-paines. Ch'tait bein pratique - i' n'y'avait pon d'êlectricité dans les caves.”
“Bein seu qu'nânnîn.”
“Et pouor ouvrer les corsets d'oeuvre,” continnuit Papa, “les femmes des caves, coumme dé raîson, faîthaient sèrvi des adgulles à ouvrer tchi 'taient en pièrre dé feu étout. Mais chenna causait d's êtînchelles coumme i' travaillaient vite et v'là tchi roussait l'oeuvre.”
“L's êléphants, Papa!”
“Mais, y'avait d'aut's annimaux préhistoriques étout,” continnuit Papa. “Y'avait des grands cats ès dents d'sâbres tchi galvaûdaient par les bouais'sies et les vallées dé Jèrri préhistorique.”
“J'ai veu des portraits d'ches cats ès dents d'sâbres,” qué j'dis. “I' 'taient bein féroces.”
“Véthe-dgia,” dit Papa. “Et pis y'avait les tchians ès dents d'sâbres, les vaques ès dents d'sâbres, les lapîns ès dents d'sâbres, et bein seu ichîn en Jèrri nou trouvait les tèrribl'yes crapauds ès dents d'sâbres. Mais ch'est eune bouonne chose qu'les ânes ès dents d'sâbres restaient en Dgèrnésy.”
“Mais, i'n'y'avait pon d'mé entre les îles à chu temps-là, Papa,” j'objectis.
“Et i' restaient là sus les falaises, ieux, pa'ce qu'i' 'taient trop têtouongnes pouor crouaîsi les landes entre les deux monts - et tchi pus est, i' 'taient trop êpeûthés par les crapauds ès dents d'sâbres.”
“Mais l's hoummes des caves, Papa, coumme tchi qu'i' chassaient l's êléphants laineurs?”
“Assa,” dit Papa, “ch'est bein sîmpl'ye, man p'tchiot. Tu sai qu'les êléphants ont peux des souothis?”
“Oui...”
“Eh bein, coumme dé raison, l's êléphants laineurs avaient peux des souothis ès dents d'sâbres. Les hoummes des caves happaient ches souothis dans des trappes à souothis faites en pièrre dé feu. Bein seu, en freunmant, ches trappes faîthaient d's êtînchelles et don les souothis 'taient ligiéthement roussies.”
“Ches pouôrres souothis!”
“L's hoummes des caves nouaient les souothis ès buts d'longues branques - coumme eune manniéthe dé lance, mais auve eune souothis ès dents d'sâbres à la pliaiche d'eune pièrre dé feu aîdgue. Les êléphants laineurs pouvaient r'niflier l'odeu des souothis brûlées dé bein au liain auve lus longues trompes, et né v'là tchi c'menchait d'les pannitchi - et quand i' viyaient l's hommes tch'avanchaient l'travèrs des landes en châtchant ches branques auve des souothis ès dents d'sâbres nouées ès buts.... Mouôn Doue, i' lus fliantchaient bas du haut des falaises dans lus pannique!”
Et pouor mouontrer coumme tchi qu'les êléphants tchiyaient, Papa laîssit tchaie un galet sus san portrait dans l'sablion.
“Mais l's hoummes avaient à grîmper ava les falaises pouor bouochi les bêtes mortes, et i' halaient lus corsets d'oeuvre roussis - ou lus pieaux - pouor pouver grîmper pus aîsiment. Et né v'là l'originne du preunmié nom d'fanmil'ye Jèrriais.”
“Et tch'est qu'est chenna, Papa?”
“N'l'as-tu pon d'vinné, man p'tit? Lé Corps-nu!”
J'sai qu'les êléphants laineurs et les cats ès dents d'sâbres ont dispathus, mais y'a acouo en existence un fichu vièr menteux!
Geraint Jennings
Févri 2003
Viyiz étout: