Dans l'gardîn, Papa 'tait à arrouôser les flieurs - des faches-dé-cat et des fioûcheurs - quand j'lî d'mandis, “Comme tchi qu'la dêsalinnâtion marche?”
“Bein, y'a eune grande machinne tchi pompe dé l'ieau d'la mé et pis ou chuche lé sé dé d'dans l'ieau et pis ou l'r'êcopit d'èrtou à la mé.” Et il arrouôsit les faches-dé-cat acouo eune fais. “Et né v'là acouo eune bouonne lache dg'ieau pouor les flieurs - et chenna sans sé, Dgieu mèrcie!”
“Et l'ieau dans les rêsèrveurs veint d'la plyie,” j'dis, “mais dé ioù qué l'ieau veint tch'est dans les pits et fontaines, Papa?”
“Y'en a tchi dithent qué l'ieau veint par des tonnelles souos la tèrre des montangnes dans l'Sud d'la France - des Pyrénées.”
“Oh, ch'n'est pon vrai, Papa!” J'criyais qué né v'là acouo ieune des fichues menneties à Papa.
“Si-fait, né v'là chein tch'i' craient, ches gens-là,” dit Papa. “La plyie tchait sus les montangnes au Sud et coule dans des caves dé ioù qu'oulle est filtrée par les rotchièrs et auprès tchique temps l'ieau arrive ichîn en Jèrri.”
“Mais ch't' ieau s'sait bein salée par la mé!” j'protestis.
“Nou-fait, man fistaud,” rêponnit Papa. “Les cheins tch'y craient dithent qu'les tonnelles sont dans l's avanteurs d'la tèrre, et qu'not' ieau veint toute fraîche des montangnes - et né v'là pouortchi les reintchivâles ès Êtats n'ont pon l'drouait d'împôser des restrictions sus les pits ès gens. Mais sai-tu, man p'tit, qu'j'ai la preuve, mé, dé chein qué j'dis?”
“Tch'est qu' ch'est, Papa?”
“Eh bein, y'a tchiques années et chenna avant qu'tu fûsse né, ches baloques dé fèrmièrs Français 'taient à protester contre lus gouvèrnément, coumme dé couôteunme, et il' avaient bliotchis les rues là-bas dans les montangnes.”
“Pouortchi qu'i' 'taient à protester, Papa?”
“Bein pouor ieux, les Français, les protêts sont coumme nos bank holidays - i' freunment lus boutiques et lus offices, i' tchittent lé travas, et les v'là à lus r'poser. Mais chein qu'i' font, ches fèrmièrs, pouor faithe acouo du fanne, ch'est d'viédgi des ouadginnées d'frits, d'lédgeunmes ou d'bêtes sus les c'mîns - chenna dépend d'l'agritchultuthe d'la contrée. Et chutte fais, là-bas dans les montangnes, ch'tait les tchultivateurs dé vîngnes et les faîtheurs d'vîn tchi 'taient à gronner contre les grôsses-têtes du pays.”
“Et tch'est qu'i' fîtent, Papa?”
“I' prîntent des ouadginnées et des ouadginnées d'boutelles dé vîn et des grandes bathilyies d'jus d'vèrjus, et les vèrsîtent dans les rues.”
“Né v'là eune pèrte dé vîn!” qué j'fis.
“Nou-fait-dgia!” excliâmit Papa. “Car tchînze jours auprès chenna, nou c'menchit à cruchi du vîn ès pits et fontaines ichîn en Jèrri. Mé, j'tais oblyigi d'brîngi mes dents auve du vîn, et Manman griyait des tâssées d'thée auve du vîn bouoilli dans l'ticl'ye!”
“Coumme tchi qu'lé vîn vînt siez nous, Papa?”
“Lé vîn vèrsé par les c'mîns là-bas avait coulé dans les rotchièrs et avait remplyi les tonnelles souos les montangnes et pis il arrivit, coumme dé raîson, en Jèrri souos la mé. Né v'là la preuve qué not' ieau veint des Pyrénées.”
“Mais tch'est qu'les gens fîtent auve tout chu vîn-là?”
“Les vaques en avaient beu des gorgies, et i' 'taient pus ou mains bédé-ouinne pouor trais jours, et mouôn Doue d'la vie, y'avait-i' d'la chant'tie et d'la dans'sie par les c'mîns! Mais chenna n'faîthait rein d'bouôn pouor les pouôrres pliantes et nou fut oblyigi d'clièrgi l'ieau dans les pits et les fontaines, et don nou l'distîllit à seule fîn d'faithe dé l'ieau d'vie dg'ieau!” Et Papa viédgit les dreins d'gouts dé d'dans l'arrouôseux sus ses fioûcheurs.
Il aime bein souongni san gardîn, man Papa, mais il est un fichu vièr menteux.
Geraint Jennings
2003
Viyiz étout: