|
Pouore Perin, je le pliains bein, Jamais i n'a la bourse en main, Car oulle est fine la Pirette; Oulle a les cliés de la tirette: Ch'était de lié que v'nait le bein, Pour li, hélas, i' n'avait rein. Ah! bein des feis le long de l'année Perin de r'pent de sa journée, Car i la mariit pour ses sous, Et criait faire un fameux coup; I n'érait vraiment pon 'té pière D'être resté dans sa misère. Quant au matin i veint d'se l'ver, Ch'est vite et vite à Dêjeuner; A peine i prend d'la nouoriture Que lié, la triste criature, Ou l'cache vite à sen travas: Pouore Perin, je l'pliains, hélas! Et quand i r'veint dans la seirée, Q'la tâche du jour est parée, Si par malheur étant lassé I prend sa tchaire et qu'i s'assied Pour se r'poser, oulle est mârrie, Et s'met tout d'un coup en furie. Au mitan quique feis d'la niet, Ne faut i pon que de sen liet, Et pour lié pliaire, Perin s'lève, Et qu'i s'en aille sus la grève Le restant de sa niet passer Pour de la plize ramasser. Ou li mène une triste vie, Tréjous tracache et tréjous crie, Tréjous tapage et tréjous brit; I faut qu'oulle ait l'malin esprit Qui la pousse ainchin, et l'enhorte A l'vengir tréjous de la sorte. Il en est déjà tout courbé, Li qu'était autrefeis si dreit; Il est couôssu de rhoumatisse: I n'peut sinon qu'il en patisse. Ou fait, hélas, tant et si bein, Qu'i s'ra bétôt capablle d'rein. L'amour de l'argent, ch'est la ruine. Sera-t-alle si achérine Quand sen Perin ne pourra pus Mettre sen pid en d'hors de l'us; Et quand veindra le drein d'sa vie, Et que sa course s'ra finie? Le corps et l'âme pour ches sous Nou sacrifie, pis nou perd tout. Hélas! il y-a bein des Pirettes Qui n'en sortent pon les mains nettes; Et pourtant i les faut quitter, Et avec sei rein emporter. A.A.L.G. |