Pour le moment je sis à d'meuther dans la campagne.
I' n'faut pas penser que j'ai abandonné man travas en ville pour venir m'muchi ichin avec l'intention de m'mettre en seutheté contre les ravages de l'épidémie, car si tel était l'cas je n'aithais fait que d'sauter de la castrole dans l'feu, les conditions étant acheteu bain piéthes dans la campagne que dans la ville, et ch'est justement pour chute raison-là que la Direction d'not'e gâzette m'a envié par ichin pour faithe un rapport sus l'triste êtat des choses.
Je sis bain heutheux de pouver annoncer à mes lecteurs que, jusqu'acheteu, Dieu merci, j'en ai rêcappé, et j'en sis bain erconnaissant, mais i' n'faut pas crier trop haut, car nou peut être en parfaite santé annièt et demain être au piâtre. Nou dithait quâsi que, tôt ou tard, i' faut qu'un châtchun ait san tou.
Je vos asseuthe que j'ai ieu de porté à ma connaissance des cas des pus péniblyes et des pus tristes. Un grand nombre d'familles toutes entchiéthes ont tchait victimes de l'impitoyablye peste, et dans bain des temps les personnes charitablyes qui lus sont dévouées pour aller les soigni, ont 'té ieux-mêmes attatchis et obligies d'abandonner tout et de s'mettre au lièt.
Quâsi partout à la campagne il existe des circonstances qui mettent la chose oquo pus sérieuse qu'en ville et qu'empêchent souvent les malades de lus soigni en temps et comme i' dévthaient. Et ch'est là ouest qu'i' y a du bestias et d's animaux qui faut qui saient soignis.
Le villais, li, si ch'est qu'il est prins malade, manque d'aller à san travas, ou, s'il a p'tit commerce et personne à l'condithe pour li, peut tréjours frumer sa boutique; ch'est sans doute une dêminse et une certaine perte pour li, mais, au mains, i' n'y a pas rain qu'enhanne ou qui souffre.
Mais ch'nest pas d'même avec le fermi!
N'importe tch'est qui s'arrive, i' faut qu'les bêtes lus soignent. Faut qu'les ch'vaux aient à mangi, et les vaques ettou et cheuses-chin ne peuvent pas être laissies sans être traites!
J'ai ouï pâler d'un cas sus une ferme, ouest qu'les vaisins, ne viyant autchun rêmouage attouo d'la pliaiche, s'en furent vaie tch'est qu'chenna voulait dithe et i' trouvithent le fermi et sa femme malades au lièt avec personne à les soigni et toutes les vaques à souffri d'la faim dans l'êtablye et qui n'avaient pas 'té traites dépis quarante-huit heuthes.
Dans une autre grande ferme couothue par une veuve avec l'aide de sa famille, tous des gens comme i' faut et travailleurs, ils ont 'té victimes et ch'qu'est bain pénible à signaler, la mort en a r'cliâmé treis, deux garçons et une fille.
Dans une autre maison le pèthe a 'té enlevé de parmi les siens opprès une courte maladie. V'là un homme qu'avait 'té longtemps en France à s'battre pour sa Patrie. Il avait 'té renvié ichin souffrant des effets du gaz Boche. I' se r'faisait d'charme et avait r'prins san travas, étant un solide ouvriyi et un habile mécanicien. Eh bain, la Grippe l'a emporté dans deus-trais jours.
Un autre, homme sobre et comme i' faut, mécanicien ettou, li, bain connu dans les paraisses de l'Ouest, sustout par les fermiers qui battent à la machine, s'est êteint comme une chandelle, laissant neuf êfants driéthe li!
Dans deux difféthentes maisons, iune à St.-Cliément, l'autre à St.-Louothains, les pathents ont ieu la douleur de perdre lus seul garçon dans la flieur de l'âge, juste au moment qu'i' prenaient la responsabilité du mênage et s'en allaient soulagi le fardé d'lus pathents et lus aidgi à joui d'un r'pos bain méthité.
Ch'est maladie et tristesse partout.
Parmi les pauvres ettou, il existe des cas bain touchants. péthe et méthe malades et personne à gagni l'pain!
Les docteurs ne savent pas par iou touâner avec touos l's appels que nou fait sus ieux, mais ch'est bain pliaisant d'vaie comment que bain des dames et messieux lus sont v'nus en aide avec lus automobiles, en distribuant des médecines dans les difféthentes paraisses de l'île.
Je n'veurs pas m'êtendre pus longuement sus un sujet aussi ludgubre.
Heutheusement, i' pathaît que l'affaithe amende sensiblyement, alors j'espèthe que par le temps que j'êcrithai man préchain articlye je s'sons tous dans d'milieu conditions.
En attendant, mes milieu souhaits à touos les malades pour un prompt et complièt rêtablissement.
Caouain
Les Chroniques de Jersey
9/11/1918
Viyiz étout: