Docteu malgrêh mé
"Oh! I'm not myself at all."
M's'affaithes et l'baté m'portent souvent en Gèrrhnézié; et j'y 'étais comme dé couôtume pour deux treïs jours l'annêh passêh, quand un matin, j'tais à attendre pour t'chiqu's'uns, j'm'promnais dans l'marchi à fruit èt à léd'ghumes èt j'marrêti à r'gardé les f'yieurs dans y'iunne des stalls, quand tout d'un co j'avîsi la bouanne femme qui 'tait en d'dans mé faithe lé signe avec sen dëit d'entré, mais comme jn'la connaissais pas j'n'y prins pas d'avis, j'pensi ou s'mêprend, pis comme j'marchais pour m'en allé, ou sortit dé d'dans sa stalle, mé prins par la manche, mé halli en d'dans, èt pis m'consiy'i à l'ouothêïlle - Savous bein docteu qué la poudre èt les boulets qu'oumme m'dounnîtres l'aut'e jour n'm'ont pas faïth d'êffëth entout! - Hein? - docteu! poudre!! boulets!!! - mais t'chi d'giâ-, èt pis l'idêh m'vins qué la pouorre bouanne femme avait p't'être la tête un m'yio cratchie, ou qu'ou qu'menchait à r'dotté, èt j'souôrit èt j'l'y dis ah! bein n'yia pas d'soin j'r'vendrait vous r'vais la s'maine tchi veint, bonjour: quand ou m'touanni la veue, m'èrrgardi des pids jusqu'à la tête, èt d'la tête jusqu'ès pids - Mais mille èt mille pardons, moussieu, est'chûzèh mé, est'chûzèh - j'pensais qu'ch'tait l'docteu C-! Oh! n'yia pas d'faute. Là! mousieu une belle f'yieur pour vot'e boutonnièthe - mèrrhcie! - èt j'm'en alli ruminant. Lé lond'main j'm'trouvi dans yiunne des Banques, j'tais au conteux à conté des sous qu'j'tais à payé, quand j'attrapi une tappe dans l'dos qué toutes mes côtes en sonnîdrent èt qui fis men vièrrh "Topper" bindé l't'chêne par dessus l'conteux. - C'h'tait un mousieu qui en m'fichant la tappe s'êcryi - Hullo' Doctor! How ar' - èt pis quand j'm'touanni la mâchouëille dé bas l'y baissi à pé près un pouce et d'm'yiée et pis ch'tait d's'est'chuses à la douzaine. - Y pensait qu'ch'tait l'docteu C - ! Bah! all reihgt n'en pâlèzh pas.
T'chique temps après, yiun d'mes amins m'inviti à passé l'jour avec l'y'i et quand j'fûmes assis à soupé cé's'èfants qui 'taient à la tab'yie aprè une p'tite volêh qu'menchîdrent à s'donné des cos d'coute les 'uns les 'autres èt pis à rithe yiun après l'autre tandis qu'à la fin y grignaient tous. - Mais tc'hê'q'y 'l'ont donc chès mousses? dis m'n'amin à sa femme. Oh! y'n peuvent pas lus empêchi de rithe, ou dis; ni mé n'in'tout (et pis ou s'êgouffi) quand j'err'gardons t'n'amin - car il est exactément coumme lé docteu C-! mais vaithe donc dis lé bouan homme, quand n'ou lé r'garde dé côtêh, ch'est comme l'y comme deux pëis.
Un aut'e jour j'm'en allais marchant bein trantchill'ment amont la rue Mansell, èt j'pâsais la boutique d'un chémiste, quand l'chémiste qui 'tait à sa porte me sal'uï avec: -
Mornin' Doctor! How's your patient?
Oh! j'dîs y va bein! Ah! dis l'chémiste j'lus avais bein dit qu'tu l'err'maïttrais sus ses pids, j'pâlîmes pour un quart d'heuthe èt pis d'vans m'en allé, j'pensi faut aussi bein l'y dithe qui s'mêprend, èt sait tu bein qué j'u toute la peine du monde à faithe chu chémiste-là craithe qui n'avait pas veu une vîzïon. - Men garçon pas d'apologies. Tu criyais qué j'tais lé docteu C-. Mais vaithe bein seux?
Un sé par un biyiau cl'yié d'Lune, j'tais à fumé ma pipe sus l'but d'la cauchie; j'r'encontri un amin èt sen garçon, j'ûmes à pé près une heuthe dé convèrrhsation, èt j'marchi avec yieux jusqu'à la ville; lé lond'main quand j'errvi m'n'amin y qu'manchi à rithe. Sai-tu bein t'chêst qu'm'en garçon m'dis quand j'vîmes siez nous hier ausé? Nennin. Eh bein y m'dis: Sais-tu bein Papa qué j'crait que lé docteu C- 'tait wrong entouorr chain qu'ou têtent à pâlé sus la cauchie: èt y'n'veur pas m'craithe quand j'l'yié dit ten nom, et y sen va v'nin à cessé attendre en d'hors de l'Hôtèhlle ou'êst tu'est pour vais si t'verrha sorti, car absolument y'n'crétha pèrrhsonne dévans qui t'vaïs.
Un' aut'e bordèh ch'tait dans la route; un homme m'arrêti: es-t'chûzèh y dis, mais j'peux pas m'enpêchi d'vous pâlé une minute, j'crait qu'ch'est Mousieu - ? Oui ch'est là men nom! Eh bein créthâith't'ous qué hier j'éthais peu gangni un souvérain, quand ou vindre dans la boutique vaïs l'maître; yiun d'nos hommes voulait m'gagi un louis qu'ou t'ête lé docteu C -.
Pour en fini, la dèrrhnié faïs qu'j'ch'tais en Gèrrhnézié ch'tait des saluts à toutes les carres, j'pense qué j'ôti men chapé chinquante faïs à du monde, qu'in' n'm'connaissaient pas pus qu'inne connaissent lé Roué dé Timbuctoo, lé bord dé men vièrrh Topper en est tout ûsèh, j'cré qu'il est temps dé faithe tchique chose, car si v'là tchi continue comme cheinne chin bein longtemps y faudra cèrrhtain'ment qu'j'm'faïche l'honneur d'allé payé une visite au docteu C- èt d'arrangi qué yiun nous deux, absolument sé faïche faithe la barbe.
C'h'la S'peut
1889
Viyiz étout: