V'la tchiques années que j'êcris dans ches colonnes ichin et mes lecteurs n'ont jamais 'té accouôtumés à prendre le Caouain sérieusement, s'attendant tréjous à tchique sorte d'niollin ou à du badinage sus des choses d'actualité et des évènements d'intéthêt local.
Mais il est des moments dans la vie quand tout badinage est impossiblye, des moments quand l'êcrivain le pus frivole peut aver le tchoeu si gros qu'i' li est bein péniblye d'êcrithe du tout à travers ses lermes.
Et patheil moment nos est arrivé.
Un coup des pus cruels est v'nu nos frapper. Notre estimablye Chef, dans la flieur de s'n âge, a 'té abattu en c'min, victime du terriblye fléau, "la grippe" qui fait tant d'ravages dans not'e petite île au moment actuel.
Oui, mes chiers lecteurs, le Caouain vaint d'perdre iun d'ses pus grands amins, iun qui n'pouorra jamais être rempliaichi car à part de toute autre considéthation j'étions attachis iun à l'autre par les liens d'un intéthêt mutuel, la propogation et la prèservation de not'e vier patouais. Combain d'séthées que j'avons passé ensemblye à chouaisi et à prépather des itèmes pour les "Séthées d'Jerriais" qu'il organisi avec tant d'succès i'y a un an ou deux, combain qu'j'avons ri, en crititchant le travas l'un de l'autre, car le "p'tit Jock" comme je l'appelions tous, ne pouvait jamais distchutter autchun sujet sans en faithe sorti le côté humoristique.
Combain qu'j'avons passé d'heuthes à faithe des plians qui' hélas, ont souvent êchoué, à cause du travas colossal qu'il avait à faithe autrement, car personne, sinon ses amins intimes, ne peut se former la moindre idée de toute la bésogne que chu p'tit homme-là entreprenait et menait à bouanne fin.
A part de sa position responsablye comme Rédacteur des Chroniques, il 'tait intérêssi dans toutes sortes d'institutions charitablyes, qui, ieux ettou s'en vont l'mantchi et dêplorer sa perte.
Au moment d'sa mort si cruellement prématuthée, il 'tait partitchuliéthement intérêssi dans la prépathation d'une série de "Séthées Jerriaises" en ville, et dans les diffethaentes pâraisses de la campagne, en mémouaithe du r'gretté collègue P. Le S. Mourant (Bram Bilo) dans tchi qu'il avait idée de r'présenter, avec l'aide des membres de sa compagnie, la majorité des êcrits de s'n amin défunt.
Et l'produit de tout chonna, le succès en était garanti d'avanche, était destiné aux bliessés des Îles de la Manche.
Inutile d'y penser acheteu.
Ch'tait Jeudi l'arlevée que j'eûmes le triste devoir de porter notre amin à sa dernié' d'meuthe.
Jamais Jerriais n'a ieu un pus biau monûment que la démonstration d'affection et d'sympathie que témoignit les nombreux assistants distindgis qu'assistithent au service funèbre.
Juges, Députés, Officiers d'la Cour, ses collègues journalistes, membres de la Société des Secours Mutuels, ses collègues du Jury, de tchi il 'tait l'chef, ont tous fait preuve par lus présence de l'amiêtchi et de l'estime qu'ils avaient pour li.
Et ch'est p't-être un p'tit mio d'consolation pour sa veuve et sa famille de penser que pour lus douleur est partagie par la majorité de l'Île, p'tits et grands, car Jock avait bain des connaissances, et nou peut dithe de li "Le connaître, ch'était l'aimer." En terminant qu'i' sait permins au Caouain d'offrir ses pus sincèthes condoléances à la veuve, et l'expression de sa pus profonde sympathie dans la douleur qui vaint de la frapper. Que sa santé li sait promptememt rêtablie afin qu'ou puisse soulagi et consoler les deux chiéthes petites filles que lus péthe aimait tant.
Caouain
Les Chroniques de Jersey
26/10/1918
Entouor E.J. Luce: