Le Ménage ès Feuvres,
St. Ouën.
Lé 12 d'août, 1972.
Moussieu l'Rédacteu,
S'en pâsse-t-i' ches jours, man bouanhomme! V'la tchi vouos fait quâsi penser au pâssage dans la Bibl'ye: "car les nâtions lus entr'-hèrtchîngn'nont entré ieux, et les rouoyaumes entré ieux, et y'étha des trembliéments d'tèrre par des bords, et y'étha des fanminnes et des troubl'yes, et ches-chîn sont les c'menchements des peines." (St. Marc, Ch. XIII, V. 8.)
Espéthons quand mème qué j'n'avons pon 'couo arrivé au point qué touos les troubl'yes tchi tracassent lé menode d'à ch't heu n'sont qu'un c'menchement d'un temps acouo piéthe à v'nin. Mais né v'la deux fais dans ma vie qu'nou vait d's'êvènements tchi m'font craithe qué des gens peuvent êt' cruels à outrance. Hitler et ses compangnons crînminnels, par exempl'ye, tchi pouvaient ordonner l'machacre dé millions d'Juis - hommes, femmes et êfants tchi n'avaient pon fait d'ma à pèrsonne. Et pon seulement ch'la, mais d'les dêtruithe en blio en l's'êtouffant touos nus auve des gaz empouaisonnants et pis brûler lus corps dans des fours crématouaithes!
À m'n idée, les membres dé l'armée illégale tchi s'appelle I.R.A. et tchi sont à tither les soudards et d'aut' pèrsonnes dans l'Nord dé l'Irlande, n'agissent pon comme des gens cîvilîsés ni n'tout. Peut-i' y'aver piéthe qué d'env'yer des mousses à pliaichi des bombes dans les maîsons, et pitchi des pièrres et des boutelles ès soudards, sachant qu'les soudards né sé r'binfréthont pon ni n'lus f'thont pon d'ma viyant tch'i' sont mousses? Y'avait mème un cas mentionné dans la gâzette l'aut' jour où'est qu'les mousses 'taient à pitchi des pièrres et à endommagi eune ambulance tch'était en train d'porter un bliessé à l'hôpita auprès qu'san compangnon v'nait d'êt' tué. Peut-i' y'aver rein d'pus lâche dé la part du I.R.A et des pathents d'ches mousses-là? Et la chose tch'est absolûment incomprannabl'ye est que lé I.R.A. n'hésite pon dé tither des gens, mème quand i' sont à êprouver à s'couothi les bliessés êtendus sus l'pavé. Nou-s-en frémit quand nou-s-y pense!
Mème en Angliètérre, pays r'nommé partout l'monde comme étant l'champion d'l'ordre, d'l'humannité et d'la louai, y'a un tas d'malfaiteurs à ch't heu tchi sont armés et tchi tuent la police et volent les banques en pliein jour. L'aut' sé, un janne "policeman" dé 21 ans tchi n'avait 'té qu'un an dans la police et sept s'maines mathié, fut tithé par iun d'ches malfaiteurs quand il 'tait à faithe sa ronde à Coventry. Lé minnistre dit ès milles pèrsonnes tch'allîdrent à l'entèrrement: "Chutte tragédie pathaît aver dêjà 'té oubliée. Un tas d'gens sont êtonnés viyant qu'chose pathelle peut s'arriver sans boulevèrser tout l'vaîsinné. Si ch'la s'était arrivé y'a vîngt ans, toute la nâtion en éthait ieu un choque.
"Est-che qué les moeurs dé la vie actualle ont tellement dêtériorié qué la violence pathaît êt' dév'nue acceptabl'ye comme êvènement ordinnaithe dé touos les jours? Ché s'sait-i' qué la télévision éthait ieu tchiquechose à y faithe? Si jé v'nons accouôteunmés à vaie les scènes dé tueûthies et d'violence qu'ou nouos montre si souvent, v'la tchi nouos fait-i' penser - sans s'en appèrchéver ni l'vouler - qu'ch'est tout partie d'la vie quôtidienne? Si ch'est d'mème, il est temps qué j'èrquémenchons à adopter les moeurs du temps jadis, l'appréciâtion des bouannes qualités d'la vie - d'vé, louoyaûté, întégrité et l'êffort dé vivre paîsibliément auve ses vaîsins."
La violence et l'anarchie sont l'singne d'eune maladie tchi c'menche à dominner l'monde. Nou n'est mème pon en seûtheté à ch't heu dans l's avions des nâtions les pus civilîsées. En prannant avantage du fait qué l'cap'taine est enchèrgi d'la seûtheté d'ses chents pâssagièrs des mille pids en l'air les malfaiteurs lé m'nichent auve lé pistolet à l'ouothelle et s'font transporter siez les Communistes d'Cuba ou les pays Arabes, et exigent des grosses sommes dé sou en mème temps.
En Améthique, les cours dé justice donnent tant d'privilèges ès malfaiteurs tchi sont poursuivis qué la police a d'la peine à les faithe peunni. Et pis l's Angliais, comme l's Améthitchains, ont aboli la peine dé mort. V'la tchi veurt dithe qué les meurtriyeurs peuvent tuer les gens sans ristchi pus qu'tchiques années en prison, mème tch'i' s'saient condâmnés à la prison pour la vie. En Améthique, i' sont libéthés d'vant bein d's années s'i' sont d'bouanne condite comme prisonnièrs car i' n'y'a pon assez d'run pour y louogi touos les condâmnés à m'suthe qué l'temps va, et i' faut les libéther pour donner lus pliaiches ès nouvieaux v'nus. Ch'est vrainment eune affaithe d'affaiblyissement d'la justice et d'l'augmentâtion du crinme.
Où'est qu'tout chu tripot-là s'en va nouos m'ner? N'est-i' pon temps qu'les gens r'quémenchement à aller à l'églyise et ouvri la Litourgie pour èrciter la Litanie et d'mander au Bouan Dgieu "Qu'i' t'pliaîthe d'înspither à toutes les nâtions l'unnion, la paix, et l'accordément; et d'nos donner un tchoeu enclyîn à t'aimer et à t'craindre, et à vivre souongneusement s'lon tes c'mandements.".
George d'La Forge
Viyiz étout: