Au Portinfé,
Jeudi au sé.
Moussieu l'Editeu,
Hier au sé, la Merrienne n'y'ayant pas dit grandchose dépis l'tais, j'éspethais qu'ou s'en allait m'laissi trantchille pour le restant d'la séthée, mais je m'trompais, car justement comme je m'prépathais pour un p'tit somme sûs l'sofa, ou qu'menchit.
"Ph'lip," ou dit, "j'ai pensé hardi à chutte pétition dans la Post, au sujet d'Huchét, tch'y fut condamné à mort l'autre jour et je n'sais vraiement pas tchi en craithe. Pouôrrais-tu m'aidgi? Sans doute tu'as veu qu'ou fut signée par trais jeunes Jêrriais?"
"Vèthe, Merrienne," j'l'y dit, "et chais tous d'bouons noms. Un Bro, un Falle et un Hamon; Tu n'pouôrrais pas trouvé miyeu. Chein qu'tu veur savé sans doute, ch'est si j'en approuve."
"Ch'est chein que j'te d'mande," ou dit, "mais j'pense bein que tu'ès comme mé, tu n'sais pas tchi craithe. Pour mettre l'affaithe en deux mots, ès-tu prêt à signé la pétition?"
Moussieu, je châtchit la tête. "Nanin, Merrienne," j'l'y dit, "je n'la sign'gnait pas, car je n'sy pas d'l'idée de chais trais jeunes garçons, que nou n'a pas l'drouait de mettre fin à la vie, même du pièthe des criminels. Et je n'peux pas vais autchune raison pour changi la sentence dans chu cas ichin. Nou n'peut pas oublié que les vingt-quatre membres du Jury 'taient unanimes et tch'y savaient qu'en trouvant l'malheutheux atchûsé coupablye, y l'condâmnais à mort."
"Et y'avait trais femmes sûs l'Jury," ou s'fit. "Si j'en avais 'tait yunne, j'crais que j'éthais fait la même chose, mais nou n'aime pas à y pensé. Te r'souveins-tu Ph'lip, d'la bordée que, sinon pour mé tu'éthais probablyement commint l'crime de meurtre, et té un Officyi d'Connêtablye?"
"J'n'ai jamais r'oublié chutte séthée-là, Merrienne," j'l'y dit. "J'en fut bein près, mais après tout, ch'tait hardi la faute à ta mèthe."
Pour explitchi, Moussieu, quand j'mathyit ma Merrienne, j'nos en fûmes d'meuthé pour une pôse avec ses pathens, et du tout qu'mench'ment y'avait du brit entre mé et ma bellemèthe. Une séthée, j'avais 'tait à une Assembliée d'Pâraisse, et après j'avais pâssé une heuthe ou d'même avec une douzaine de bouons Saint-Ouennais dans l'auberge, et y n'y'a pas d'doute que j'tais un mio êcauffé, quand j'print la route pour la maison. J'appréchais d'la porte, quand soudainement oulle ouvrit et ne v'là la vieille à m'dithe que j'tais plien, que ch'tait une honte et qu'oulle avait tréjous 'tait seuze que sa fille avait mathié un ivrogne. Dans chu moment-là Moussieu, le sang me montit à la tête, et si ma Merrienne n'avait pas appathu, seux et certain que j'éthais êtranglé sa mèthe, et sans doute j'éthais 'tait pendu si n'y avait pas yeu sûs l'Jury assez d'hommes tch'avaient des bellemèthes étout. Ma Merrienne gaffit la bouonnefemme par les êpaules, l'y fliantchit une paffe et l'y dit de s'mêlé d'ses affaithes. Avec un mio d'aide j'put ramonté les d'grès et l'préchain jour j'nos en fûmes d'meuthé ailleurs.
Ach'teu, Moussieu, j'peux vais qu'la Merrienne, tch'y veint d'médité tout chu temps, a un autre sujét sûs l'but d'sa langue et je f'thai mûs d'l'y d'mandé s'ou veur allé s'couochi, car pour vos dithe vrais, j'tais un mio lâssé.
"Pas ocquo," ou s'fit. "Y'a ocquo l's'Etats et les sous tch'ils ont voté. As-tu veu l'ênorme somme que chutte nouvélle êcole à Saint-Sauveux s'en va couôté?"
"Oui," j'l'y dit, "et j'ai veu bein d'autres dêpenses tchi m'font craithe que l'coffre-fort des Etats est comme le bathi d'flieu à la veuve dans l'Ancien Testament, ch'est-à-dithe tchi n'a pas d'fond. Ch'est dommage sûs un sens que l'Sénateur Krichefski n'tait pas là, car sans doute il éthait d'mandé tchiques mille louis d'pûs pour le tourisme."
"Ne t'gène pas," ou s'fit, "le ma tch'il a attrapé n's'en va pas l'gardé au liet longtemps. Ch'est une course entre l'y et l'John Le Mérquand pour vais tchèsqu'y pouôrra dêpensé pûs d'sous, et ch'n'est pas un g'ville du pid pûs ou moins tchi s'en va faithe le gros bouonhomme abandonné l'affaithe. Mais y'a ocquo une chose, Ph'lip, que j'n'avons pas pour bein longtemps à distchuté, et ch'est le triste êtat de chais pouôres hôtéliers tch'y n'peuvent pas fourni tout chein tch'ils avaient promint à lûs vîsiteurs, parsqu'y n'ont pas assez d'iau. Ch'est bein du, tu sais, Ph'lip, d'avé à prendre des sous qu'nou n'a pas gâgni."
"Damme vèthe," j'l'y dit. "J'les pliains bein, chais pouôres hôtéliers. Ch'est assez pour vos faithe plieuthé."
La Merrienne dit que j'avais print l'ahabitude dérnièthement d'en fichi du monde.
"Pas du tout," j'l'y dit, "mais je n's'y pas si bête que je n'peux pas vais que l's'hôtéliers n'sont pas si gènés comme tout chonna. Y n'pâslent pas, par éxemplye de réduithe lûs comptes. Et après tout ne v'là la saison bétôt finie, et y'étha d'l'iau l'année tchi veint. Dans l'entretemps, Merrienne, y faut félicité l'Comité d'la Santé Publique."
"Et pourtchi?"
"Pour avé fait chein tch'ils éthaient deu faithe y'a longtemps," j'l'y dit.
"Man pouôre homme," ou s'fit, "peux-tu m'nommé un comité de tch'y qu'nou n'peut pas dithe la même chose?"
Et Moussieu, avec toute la bouonne volonté du monde, je n'pouvais pas.
Ph'lip
Les Chroniques de Jersey 19/9/1959
Viyiz étout: