As-tu payi ton rât?

"As-tu payi ton rât?" mé d'mandit l'Ph'lip Desclios l'aut' jour, "si tu n'l'as pas acquo payi tu t'en vas t'trouver en boête."

"Mais, mon Ph'lip," j'lis dis, "dé s'trouver en boête ch'est mus qué d'aller en vacance, car v'là tchi n'couâte rein. I' paraît qu'nou' mange mus à la Mouaie qué nou'n'fait siez sé, et nou'n'a rein à faithe qué d'jouer ès cartes ou d'érgarder la télévisioun. Ergas, té v'là à t'estchînter dans tes clios à loundgeur dé jour, tu t'lêves à chîntch' heures du matin sept jours la s'maine pour te mett' à traithe et à soigni d'tes bêtes, et tu n'es jamais fini d'ton tripot d'vant neuv'heures du sé. Mon garçoun, trais mais au cliou té f'raient eunne belle vacance et t'en dêhallrais, bah, vingt ans d'rajeunni. Et pense qué t'éthais ton lyief, ton mangi et ton liet d'fournis sans qué v'là tchin't éthait couôtait eun sou. Y'a des gens qui dêpensent des milles dé louis aller en vacance. I' passent des heures dé mînsèthe dans d's'aviouns, ouèsqu'i' sount traités pièthes qué nou'n'trait'tait eun tchian, il' arrivent à lus piètche dé vacance dans l'mitan d'la niet, attendent deux ou trais heures pour passer la douane, à la fîn i' trouvent eune taxi qu'i' lus chèrge vingt fais trop pour les cachi à lus hotel, là i' trouvent qué la chambre qué, s'loun la brochuthe, avait d'veues des pus magnifiques sus la côte et la mé, érgarde sus eun'abattoir ou sus l'bel d'eun marchand d'tchèrboun, i' trouvent qué lus liet est înfesté d'puches, et l'loundemain quand i'vount à la grève, tout ch'q'i' vaient ch'n'est qu'des tracteurs et des camiouns qu'apportent du sablyioun, car, mon Ph'lip, j'counnais bein ches grèves quand l'Buoan Djieu les crêit i'n'mînt pas eune grain d'sablyioun d'sus. Estch' pour vaie d'ité, pour êt' traités coummes des animaux ou coumme des bachouards, qué nou paye tant d'sou pour aller s'balader en êtrangi? I' vaut bein mus passer trais mais en boête à la Mouaie."

"Tout boun, tout boun," s'fit l'Ph'lip, "mais ches trais mais qu'j'éthais 'té en vacance, coumme tu dis, à la Mouaie, tchi'qu'éthait trait mes vaques et soigni mes couochouns?"

"Ah," j'lis dis, "si t'avais ieu eune bidèt et eune buoan griffoun coumme nous avait dans l'temps, eunne canne à traithe et eunne scabelle, j'éthais 'té bein aise, lé temps qu'tu 'tais en boête, dé t'griffounner ta terre et d'traithe tes vaques. Mais né m'pâles pas d'tracteurs ou d'machainnes à traithe, car j'n'y counnais rein. Et tes couochouns, j'éspèthe qué d'temps en temps, tu lus dounnes eune lopîn d'tchèrboun à grudgi, car n'y'a rein d'mus pour les garder en buon êtat."

Lé Ph'lip s'êbouffit d'rithe: "Si tu tâchais d'fèrmer en Jèrri au jour d'aniet coumme nou' fèrmait dans l'vièr temps, tu t'trouv'rais bein vite souâs l'fou."

Et en effet coumme d'amors, lé Ph'lip a raisoun.

Lé Vièr Trint'ais
JEP 27/11/1990