Trenton,
Michigan, USA.
Lé 13 dé juin, 1981.
Moussieu l'Rédacteu,
J'viens d'èrchéver la gâzette dé Jèrri du 23 d'avri, et j'ai r'gret d'vaie qu'les nouvelles dédans n'sont pon d'la sorte tchi f'thaient un Jèrriais ordgilleux dé s'n île natale. La preunmié page nouos annonce qu'un agent d'police fut assauté et rendu sans connaîssance par des malfaiteurs. La grand' honte est qu'des villains îndividus assautent la police atout des boutelles. V'là tchi montre qué la bouaisson est hardi la cause dé chutte mauvaîtchi. Et acouo l's aubèrges mênagent à aver pèrmission d'bâti ou agrandi lus prémisses appathemment aisiement, quandi qu'eune pèrsonne ordinnathe a l'dgiâbl'ye à confêsser pour aver pèrmission d'bâti eune maison d'habitâtion!
Eune aut articl'ye, dans la même page etout, nouos dit qu'un brave petit tchian vînt en aîgue quand un fripon attatchi eune femme par driéthe en ville et la m'nichit auve un couté. Chu p'tit tchian fit êvidemment peux au fripon d'êt' mordu et sauvi sa maitrêsse d'êt' volée, et p't-et assaillie.
Acouo eune aut' articl'ye dans la même preunmié page, nouos dit qu'un visiteur eut san bîssa et appatheil et grêment photographique volés en pliein jour quand il 'tait en train d'prendre des portraits, à West Park, du Châté Êlizabé. Un peuille lé tînt quandi qu'deux autres fichaient l'camp atout s'n appatheil. Et san pâsseport est hors auve san bîssa.
Mais ch'n'est pon là tout l'malheu annoncé dans la preunmié page dé la gâzette. Un îndividu est arrêté pour aver assailli un autre homme dans Hope Street au Dînmanche. Il est souos caution dé deux chents louis pour sén appathence dévant Justice. Ch'est seux tch'i' n'èrvénaient pon d'l'églyise, ches deux-là, ouaithe qué ch'tait Dînmanche!
N'est-i' pon grand temps qué l's autorités lus d'mentent d'y porter r'miéde, à ch't êtat violent tchi c'menche à faithe peux au monde dé marchi dans les rues d'la ville, même en pliein jour? N'est-i' pon temps d'rètablyi l'ûsage dé la baïette? Et d'faithe la peine dé prison eune vraie peine auve travaux forchis, à la pliaìche d'un r'pos dans eune prison modèrne tchi r'présente pus d'confort qué j'n'avons nouos-mêmes connu dans nouot' janne temps?
La deuxiéme page dé la gâzette est à maîntchi couvèrte dé lettres dé vouos lecteurs tch'attithent attention à la détériorâtion d'la qualité d'la vie d'à ch't heu dans l'Île. Y'a au main siex lettres au sujet, et un aut' trais tch'attithent l'attention au fait qu'les trottouaithes dé la ville sont tathés d'figue dé tchian et qu'ch'est dêgouotant pour lé piéton d'aver à y marchi.
La traisième page nouos dit qué la grand' féte dé Pâques fut gâtée par lé nombre d'accidents d'motos dans les routes dé l'Île. Un tas des victînmes dé ches avâries d'la route eûdrent à êt' hospitalisés, et huit motos 'taient si endommagis tch'i' n'valent pon la peine d'èrgraie. V'là tchi m'fait penser au nombre d'muthâles qué nou vait êt' en partie abattues dans les campangnes et tch'ont bésoin d'êt' èrbâties. Eune chose èrmèrquabl'ye au sujet d'ches accidents d'motos est la jannèche des dgiex pèrsonnes mentionnées comme cacheurs et passagièrs. Y'en a trais tch'ont 20 ans, trais tch'en ont 24, et les quatre autres 26, 27, 28 et 29 respectivement.
Ch'est seux tch'i' y'a bein trop d'motos par les c'mîns en Jèrri et qu'ch'est ieune des causes d'accidents, mais à la pliaiche dé tâchi d'garder l'nombre à bas l's autorités encouothagent l'agrandissement du nombre par élaîzi les routes, et continnuer à bâti des garages à multipl'yes êtages. Et eune pliainte qué j'vai dans la gâzette est tch'il est probabl'ye qu'eune belle rangie d'arbres au Rouoge Bouillon s'en va êt' abbattue pour en acc'moder acouo pus! Peut-i y'aver rein d'pus nâvrant pour l'esprit consèrvateur?
Heutheusement, y'a au mains tchiquechose dé pliaisant dans la gâzette pour en finni. La préchaine page nouos montre un bieau portrait du Docteu Èrtu C. Mouothant sus l'haut du Pinnacl'ye ès Landes à St. Ouën. Un mangnifique accomplyissement pour lé fanmeux docteu considéthant tch'il a septante-sept ans. J'mé sis souvent d'mandé si les Jèrriais savent apprécier qu'Jèrri a produit un moussieu d'sa capacité extraordinnaithe. Chirurgien et Docteu en Méd'cinne, archéologue et aut' qualificâtions tchi mettent eune longue rangie d'lettres majuscules au but d'san nom, il est iun des grands savants du monde. Il est un mangifique type dé vièr Jèrriais et aussi charmant comme il est capabl'ye, et Jèrri dait êt' ordgilleux d'aver un fis d'san calibre.
George d'La Forge
Viyiz étout: