Pièrre Touzé vînt nouos vaie Dînmanche l'arlévée. "As-tu liu dans la gâzette," i' mé d'mandit: "Qué d'ieau bouol'lait à deux milles dé profondeu dans la tèrre?"
"Nannîn dgia, Pièrre," j'lî dis: "J'avons 'té si embarassés à dêfoui pour la s'menche que j'n'ai pon ieu grand temps d'liéthe les gâzettes. Ch'est drôle, tout d'même, qué Mêrayeu n'la pon veu, lyi, - car ou' vait tréjous tout l'niolîn tch'est dans les gâzettes, mais ou' n'sait janmais tch'est qu'est à prêchi au templ'ye parouaîssial au Dînmanche matîn quand j'lî d'mande!"
"N'l'êcoutez pon, Maît' Pièrre!" lî dît Mêrayeu: "Ou' savez aussîn bein comme mé qué l'George n'a pon bésouain d'mé d'mander d'ité. I' n'est pon si bête tch'i' n'peut pon liéthe l's'annonces dans la gâzette li-même! Mais tch'est qu'ou' nouos dites entouor' un pîts?"
"J'n'ai pon pâlé d'un pîts du tout, "s'fît Pièrre: "J'dîsais qu'j'avais liu qué l'ieau bouor à eune profondeu dé deux milles dans la tèrre. Et v'là tchi m'a donné eune idée pour faithe des sou!"
"Tu-as ieu tant d'idées pour faithe des sou toute ta vie, qu'tu dév'thais êt' riche, man pouor' Pièrre!" j'lî dis. "Tu m'fais penser à un gâs qué j'connais en Améthique. I' peut penser à pus d'plians pour faithe des hèrpîns qu'autcheun êcrivain en Jèrri, - et i' n'en a janmais, d'hèrpîns! Jé n'connais qu'eune maniéthe d'en faithe, mé. Ch'est d'travailli niet et jour comme un mèrcénaithe et d'sauver touos les sou qu'nou peut met' la patte dessus! Ioù qu'tu-as 'té dênichi chu bêtin-là? Ch'est seux qu'ch'n'est pon dans la Chronique!"
"Nan," Pièrre mé dît: "Ch'tait dans la gâzette en Angliais qué l'mousse nouos apporte au sé. Et ch'n'est pon du bêtîn!"
"Eh bein, don, - dis nous tch'il idée qu'tu-as dans la cabiche pour faithe des sou!" j'lî dis: "J'aim'thais bein en faithe aisiement étout, mé, - a la pliaiche d'êt' à négrer ma vie touos les jours dans les clios!"
"Eh bein," Pièrre nouos dît: "Quand j'tais à liéthe chen'na, jé c'menchi a penser à toutes les femmes partout Jèrri tch'étaient à bouoilli d'ieau pour faithe du thée, et pis à toute l'ieau tch'i' fallait r'bouoilli eune heuthe ou deux pus tard pour laver les vaissieaux, et acouo pus tard dans la séthée pour laver les mousses et les faithe laver lus pids d'vant lus couochi! Sapresti! Ch'est tch'il en faut, d'ieau caude!"
"Véthe," j'lî dis: "Et pis tu-as oubliyé les vèrres cauds!"
"Laisses-don Mess Touzé nouos dithe tch'est qu'il a dans l'idée!" s'fit Mêrayeu: "Ch'est si simpl'ye qué j'sis ravi qu'pèrsonne que mé n'l'y-a pon pensé," Pièrre nouos dît: "J'ai un pîts dans ma bel tchi n'a janmais 'té a sé. I' n'l'y-a qu'à l'creuser jusqu'a tch'il aie dux milles dé profondeu, - et i' s'sa tréjous pliein d'ieau caude et j'pouorrais met' des tchuiyaux de man pîts à toutes les maiethons d'St. Ou et lus vendre d'ieau caude à tant l'pot. J'y f'thais des sou, - et ch'es'sait millieu marchi pour les vaiethîns dé l'acater a la pliaiche dé baûler un tas d'tchèrbon pour cauffer d'ieau ieux-mêmes! Tch'est qu'tén crai?"
"Pièrre," j'lî dis: "Tu n'est pon bein dans ta tête! Creuser un pîts deux milles dé profondeu? Dépis qué l'ieau bouor à chutte profondeu-là, tch'est qu'i' t'arriv'thai quand t'y veindrais, té, là-bas? Tu s'sais rôti! Et pis, étout, ioù qu'tu met'tais la tèrre qué tu hal'lais en creusant? Et comment qu'tu prend'dais pour la monter à haut? T'èrvai-tu auve un boutchet au but d'eune corde dé deux milles de long? Tu f'thas mus d'aller vaie si l'y-a eune pliaiche pour té à l'Asile, man pouor' garçon!"
George d'La Forge
Les Chroniques de Jersey 22/8/1951
Viyiz étout: