La plyie tchait dans un temps mouoilli, et ch'est bein seu qu'Jèrri n'est pon du vaîthinné du Sahara, et j'avons deux'trais d'gouts d'plyie dé temps à aut'. S'lon la saîson et l'mêtchi, les gens maûdissent l'ieau du ciel ou en sont souôlagis. J'n'avons pon d'monts coêffis d'né ou d'riviéthes dé gliaiche pouor garder dé l'ieau et don ch'est împortant qu'la plyie veinge èrabréver rédguliéthement nos rêserveurs.
Même si ch'est bein nécessaithe qu'not' système dg'ieau sait d'saltéthé, jé n'voulons pon êt' trempés coumme un vâtard quand j'allons boutitchi ou nos prom'ner par les c'mîns. Né v'chîn pouortchi qu'lé paraplyie est ieune des miyeuthes înventions du monde – pouor dé mé auprès la bike, ch'est l'paraplyie automatique tch'est en tête des contributions mécanniques à la civilisâtion. Nou ponce un p'tit bouton auve lé pônchet et né v'là lé paraplyie tchi s'ouvre à seule fîn d'vos abriyer dé toute dêtchèrque.
Ch'est un pitchi qu'la civilisâtion n'a pon jusqu'achteu dêbèrtchi en France où'qu'les pouôrres innouothants sembl'yent lus mêfier du paraplyie. Av'-ous veu ches touristes Français tch'arrivent en Jèrri et tchi lus traûlent par les c'mîns d'la Ville zipés dans lus annorâques coumme si St. Hélyi s'trouvait ès fonds pèrdus d'eune forêt d'plyie? Pouortchi qu'i' n'portent pon un p'tit paraplyie à la pliaiche dé lus enfliuber en goretex dé même? Sont-i' fos ches Français goretexés!
Lé d'mié-bas et l'paraplyie êtraitement fèrlé sont les symboles traditionnels du moussieu Angliais, mais les cheins du campangnard Français sont l'béret et l'long pain. Un long pain n'vos gardétha dgéthe au sé, mais nou n'peut pon faithe d'un paraplyie eune bouonne beurrée.
Et v'là tchi prouve qué ch'n'est pon seul'ment sus l'pain qué l'homme viv'tha, i' vos faut un paraplyie étout!
Geraint Jennings
Viyiz étout: