Quand i' tchait d'la plyie l'tchînze dé Juilet,
Pouor quarante jours auprès il en tchait.
Mais si l'tchînze dé Juilet est bein sé,
Pouor quarante jours i' f'tha d'ité.
Si l'changement d'clyînmat caûffe lé monde à l'av'nîn, i' faut sé d'mander si la Saint Swithîn s'en va changi d'la même manniéthe. L's êl'veurs d'chanmeaux et tchultivateurs dé mangues et d'bananes en Jèrri en chent ans, éthont-i' à espéther pouor d'la plyie l'tchînze dé Juilet à la pliaiche d'ouragans, dé typhons ou d'touâles?
Ch'est en tchi nou gronne s'i' tchait d'la plyie, nou gronmâche acouo pus s'il en dêtchèrque, mais si lé temps est pouffre et s'i' fait eune vraie arsion, v'là tchi qu'nou n'peut dgéthe sténer!
Nou dit qu'i' n'y'a rein d'nouvé souos l'solé, mais si la caûff'thie globale continnue d'même, j'pouôrrêmes vaie d'tchi exotique en Jèrri – des d'sèrts quâsi-Sahariens à St. Ouën, des forêts d'plyie à St. Pièrre et des jungl'yes tropiques à La Trinneté. Mais i' faut garder les dés crouaîsis qu'lé pouôrre St. Cliément n'sait pon compliètement n'yé par la mathée tchi monte!
Même si l'bouôn St.Swithîn nos env'yie tchiquefais deux d'gouts d'plyie duthant Juilet et Août, j'avons la satisfaction d'saver qu'les achies r'chèrgent nos rêsèrveurs.
L'ieau du ciel est précieuse pa'ce qué j'n'avons pon dé montangnes couvèrtes dé né, ni d'mathes, ni d'riviéthes. Mais pouor achteu i' n'y'a pon dé d'sèrts ni d'jungl'yes nitout!
Geraint Jennings
Viyiz étout: